Ноябриин 21-дэ Агын соёлой байшан соо Надежда Птушкинагай «Пока она умирала» зохёолоор «Эжыетнай эрьенгээ...» зүжэг табигдаа. Энэ зүжэгтэй танилсуулга Россиин габьяата артистка Должин Тангатовагай ойн баярта дашарамдуулагдаа.
- Должин Жаргаловна, намтартаяа богонихоноор танилсуулыт даа. Яагаад артистка болоһомта?
- Агын тойрогой Согто-Хангил нютагта 1967 ондо Тангадай Жаргалай ба Балданай Цыбегмидэй бүлэдэ 9 хүүгэдэй 7-дохинь боложо түрэһэнби. Һургуулида ороод дүүргэтэрээ, тайзан дээрэһээ буугаагүйлби даа гэжэ хэлэхээр. Һургуулиин үедэ хүүгэдэй уран һайханай харалгада эдэбхитэйгээр хабаадажа, дууладаг, хатардаг һэнби. Ехэ Цыпелма эгэшэм «Байгал» театрай хатаршан ябаа, тиигээд би хара багаһаа хатарһан хадаа хатаршан лэ болохоб гэжэ бододог байгааб. Согто-Хангилдамнай драмкружок гэжэ байгаагүй, тиимэһээ драматическа артистын мэргэжэл бии гэжэ мэдэхэгүй ябааб, артист гээшэ бүхы юумэ шадаха ёһотой гэжэ һанадаг һэнби. Ямар бэ даа ондоо мэргэжэл шэлэхэ гэжэ ухаандамнишье ородоггүй һэн бэлэй. Дүү Данзан хүбүүнтэеэ скакалкын барюул бариһан, хүшэгын саанаһаа гаража, «Выступает народный артист..» гэжэ наададаг һэмди. Хүүгэд хара багаһаа ерээдүйгөө мэдэдэг гээшэ тэрэ байгаа гү даа.
- Бэлиг шадабаритнай түрэлхиин байгаа ёһотой?
- Аба эжымнай зохёохы бэлигтэй зон байһан гэжэ бүдүүн болоод байхадаа ойлгообди. Эжы хубсаһыемнай оёод үгэхэ. Гэртэхимнай хүүгэдээ ходо дэмжэжэ, юумэнһээ үлөөхэ дурагүй һэн. Бидэ, булта хүүгэд, абатаяа һур харбадаг бэлэйбди. Абамнай бүхэли наһаараа жолоошон ябаа, түрүүлэгшые шэрэдэг һэн, тиихэдээ хото город, байд гээд лэ Улаан-Үдэ ошодог байгаа. Цыпелма абгай абадаа Бурдрамда зүжэгүүдые харуулха. Нэгэтэ үбэл Бурдрамда зүжэгэй дүүрэхэдэ, соносхол хэлээ ха: «Мүнөө жэл Ленинградай дээдэ һургуулида хүүгэдые суглуулнабди, һургуулияа дүүргэжэ байһан хүүгэдтэй һаа, шалгалта барихыень эльгээгыт». Цыпелма абгай хөөрэдэг: «Би ойлгоошьегүй байгааб, харин аба «Должимнай һургуулияа мүнөө жэл дүүргэхэ, иишэнь эльгээхэ байгаа бэшэ гүбди» гээ һэн. Удаань соносхол газетэһээ хайшалжа абаад, анкетэ хүсэлдүүлжэ бэшээд табяабди. Һургуулияа дүүргэмсээрээ, хэндэшье хэлэнгүй, Улаан-Үдэ хото гаража ошооб.
Дэлгэрэнгыгээр 49-дэхи дугаарта
