Тойрогой гурбан аймагай, Ага тосхоной һайн дуранай түймэр саралгын гэшүүдэй энэ жэлэй галай аюултай тэмсэхэ талаар хэр зэргэ бэлэн байһан тушаа харалга-мүрысѳѳн заншалта ёһоор мартын 26-да эмхидхэгдээ.
Хойто-Агын һайн дуранай түймэр сарадаг дружина.
Үдын урда тээ Дулдаргада, үдэ багта Амидхаашада, үдэһөө хойшо Могойтодо харалга эмхидхэгдээ. Харалгын урда тээ зүблөөнүүд үнгэргэгдэһэн байна. Элидхэгшэдэй мэдээсэһээр, тойрогой хүдөө һуурингууд ба һайн дуранай түймэр сарадаг дружинанууд энэ жэлэй түймэрэй хаһада бэлэн. Түймэр саралгын, хэлхеэ холбооной хэрэгсэлнүүдээр, РЛО-нуудаар, ойн патрульна УАЗ авто-унаагаар, трактор техникээр, шэнгэн түлишөөр, эдеэ хоолой зүйлнүүдээр хангаатай. Ойн ажахын хүдэлмэрилэгшэд хашагһаа һэргылжэ, тарилгануудые абаһан. Зоной ой руу ябахагүйн тула соносхолнууд табигдаһан. Намартаа хүдөө һуурингуудые тойруулжа, түймэрһөө һэргылхэ газар хахалагдаһан байна.
Акшаагай, Хэрын, Шэтын аймагуудай дэбисхэр дээрэ галай аюул һүжэржэ эхилээ. Саһан түргэн хайлана, шииг нойтон ороногүй. Байгша он-до сагай уларил хуурай байхаар хүлеэгдэнэ. Тиимэһээ галай аюултай тэмсэхэ талаар һэргэг байхань шухала. Галай аюулай ехээр һүжэрбэл, хизаарай дэбисхэр дээрэ онсо байдал соносхогдохо. Апрелиин 1-һээ ой руу ябалга хоригдобо. Модо, түлеэ бэлдэжэ байһан эрхэтэд ой сооһоо гараха уялгатай. Тойрогой онсо байдал һэргылхэ комиссиин секретарь Арсалан Бадмаев ойн баялигуудые түймэрһөө аршалха, хамгаалха талаар абтаһан шиидхэбэринүү-дые тодорхойлһон байна. Захиралтануудай тайлбаринуудтай танилсахада, нобшо хаядаг газарта целлофан, саарһан туулмаг, хорообхын саарһа г.м. галдахагүй. Шанга һалхинай болобол, гал хүнэй харууһанһаа гаража, зоной ажаһуудаг һуурин, ой руу һүжэржэ магад. Галай аюулай гарахагүйн тула олондо мэдээсэл тараадаг хэрэгсэлнүүдээр олониитэдэ дуулгахань, эрдэм олгодог байшангуудта үхибүүдтэ ойлгууламжын хүдэлмэринүүдые ябуулхань шухала. Ой руу зоной орохогүйн тула дотоодын хэрэгүүдэй таһагай, ойн ажахын хүдэлмэрилэгшэдэй постнуудые байгуулха, саг үргэлжэ патрульна рейднүүдые ябуулжа байха хэрэгтэй.
Дулдарга һууринай, Могойто тосхоной стадионгууд, Амидхаашын ипподром дээрэ аймагуудай тусхай түймэртэй тэмсэхэ албангуудай, хүдөө һуурингуудай һайн дуранай түймэр сарадаг гэшүүд комиссиин урда тээ түймэр саралгада хэрэглэгдэхэ зэбсэгүүдые: хүрзэ, хюрөө, тармуур, мотопомпо, РЛО, хубсаһанай, эдеэ хоолой зүйлнүүдые дэлгээһэн байха юм.
Энэ хаягаар электронно захил хэхэ аргатайт Адрес электронной почты защищен от спам-ботов. Для просмотра адреса в вашем браузере должен быть включен Javascript.
