Уран гартай эжы
   Бэлигмагай нагаса аба – багшын ажалай ветеран, Агын тойрогой мэдээжэ санашан Виктор Чимитов, нагаса эжынь – «Арадай гэгээрэлэй эрхим» нэрэ зэргэтэй Бальжима Чимитова хоёр - Чимитовтэн-Тудуповтанай багшанарай уг залгамжалал бүлэнэрэй үринэр, наһаараа Ушарбайн дунда һургуулида багшалһан юм.
Бальжима Мункожаргаловнагай хөөрэһөөр, хоодой харгана угай Түдэбэй Мункожаргал абань 1918 оной, Ушарбай нютагта тоонтотой, багша ябаһан, Эсэгын дайнда хабаадагша юм. Эжынь, Зугаалай нютагай байтай хүбдүүд омогой Намсарайн Цыренжабай Бутит, 1930 ондо түрэһэн, гурбан басагадай одхон байһан. Абань залуугаар наһа баража, эжынь гансаараа хүүгэдээ үндылгэһэн. «Эжымнай – Эхэ-герой, ехэ номгон, түбшэн даруу зантай һэн. Олон юумэ багтаажа шададаг, халтад гэһэн юумэндэ уур сухал болодоггүй, тэсэбэритэй хүн бэлэй. Хүүгэдтээ «хүнтэй бү хэрэлдэгты, хүниие бү хараагты, хүн хүнэй сухалһаа айхагүй, хүнэй һэшхэлһээ айха» гэжэ хэлэдэг һэн. Эдеэ буйлуулхадаа бэрхэ, улай хэхэдэ, гэдэһэ яагаад аршахаб, ямар эдеэ хэхэб, яагаад амтатайгаар шанахаб г.м. эхилээд, бултыень басагадтаа заажа үгэһэн. Уран гартай оёдолшон байһан. Хахад Ушарбайн зондо дэгэл – басаганай заһал, ажалай хүбэнтэй дэгэл г.м. бултыень оёһон ха. Хадамда гарахадань, бүхы басагадтаа, зээнэртээ дэгэл оёжо үгэһэн», - гэжэ басаганиинь дурсана. Дээдэ гарай оёдолшод болоошьегүй һаа, эжынгээ һургаһаар, энэ бүлын басагад булта оёхо, нэхэхэ шадабаритай юм. «Хүүгэдэйнгээ бага байхада, бүхы хубсаһыень оёдог һэмди, - гэжэ Бальжима Мункожаргаловна нэмэнэ. - Эжынгээ һургаалаар мүнөө болотор ябадаг зон гээшэлди даа».

You have no rights to post comments