Аха дүүнэртэеэ
дайнда хабаадаа
Даширабдан Лодоев 1922 ондо Зүдхэли нютагта олон хүүгэдтэй таряаша малша Цыренэй Аюшын болон Дарима Данжуровагай гэр бүлэдэ түрэһэн намтартай. Бүлэнь 12 хүүгэдтэй байһан, Даширабдан хүбүүгээ бага байхадань, дүтын түрэл Борогшоной Лодой болон Цыренэй Шэмэдэй гэр бүлэдэ хүүгэд болгожо үгэһэн бэлэй.
Эсэгын дайнай эхилхэдэ, түрэһэн 5 аха дүүнэр армида абтаһан, хоёр аха дүүнэр – Даширабдан Лодоев, Дашидондок Аюшиев гэртээ бусаһан, харин 3 аханарынь – Нима Аюшиев, Санжимитуп Аюшиев болон Намнан-Гомбо Доргиев дайнһаа бусаха хубигүй байшоо.
1931 ондо Даширабдан Лодоев Зүдхэлиин эхин шатын һургуулида ороо, һүүлээрнь Табтаанайн дунда һургуулида һуралсалаа үргэлжэлүүлһэн юм. Дайнай урда тээ түрэл колхоздоо ажалда ябаа. Даширабдан Лодоев 1941 оной декабриин 23-да сэрэгэй албанда татагдажа, урид Хара нуурай станцида полкын һургуулида һураа, тиигээд 1942 оной май һарада Соловьёвск станци эльгээгдэжэ, курсантын бригадада шэнэ, орёо – 82 миллиметрэй миномёт үзэжэ эхилээ. 1943 оной апрелиин 3-да адууһатай эшелон Воронеж хото абаашалдажа ошоһон байна. Тэндэһээ саашаа баруун зүг тээшэ 69-дэхи гвардейскэ дивизиин бүридэлдэ миномётно расчёдой миномётчигоор ошоо.
Дайнай
бурма соо
Украинын Сумын можын Ахтырка хото шадар 1943 оной августын 24-дэ түрүүшын байлдаанда хабаадаа. Шанга байлдаанууд болоһон байна. Полтавын можын Решетиловка һууринда дайсадай ехэ шуналтай эсэргүүсэлгэ сүмэ сохижо, дивизинь Днепр мүрэн руу гараа. Агууехэ мүрэн хүн бүхэн арга шадалаараа гаталаа, миномёдуудые уһанай онгосонууд дээрэ шэрээ, юундэб гэхэдэ сапёрнууд понтонно хүүргэнүүдые зохёожо үрдеэгүй – баруун эрьедэнь немецүүд аргагүй ехээр бомбодожо байгаа. 1943 оной ноябриин 12-то Днепр гаталаад, баруун эрьедэнь миномёдһоо буудажа байхадаа, зүүн хүлөө үбдэгһөө дээшэ шархатаһан байна. Госпитальдо аргалуу-лаад, 1943 оной декабриин 25-да батарейнгээ хэлхеэ холбоошон болоо, тиигэжэ энэ тушаалдаа илалта болотор ябаа.
Корсунь-Шевченковскэ операцида хабаадаа, тиихэдэ Украинын баруун бэедэ хүреэлэгдэһэн немецүүдэй бүлэг һалгагдаһан байна.
Солдадай дайшалхы замай нэгэ ушар тухай. Энэ ушар 1944 оной август һарада дайсадай багахан бүлэгүүдээр блокада сүмэ сохихо һэдэлгэ гаргахада, Ясско-Кишинёвско операцида болоһон юм. Һүниин байлдаан эхилжэ, тэдэ дивизиин штабтай хэлхеэ холбоогүй болошоо һэн. Гурбан хэлхеэ холбоошодые заһахыень эльгээгээ. Дайсанай забда залигүй буудалга доро Прут голой гарсада утаһа таһалалга оложо, тэдэ гурбан хэлхеэ холбоотой болгоо бэлэй. Тиигэжэ ара талаһаа тэдээндэ дэмжэлтэ үзүүлэгдэжэ, манайхин илалта туйлаа. Энэ баатаршалга гаргаһан гурбан хэлхеэ холбоошод, тэдэнэй тоодо нютагаймнай сэрэгшэ «Шэн зоригой түлөө» медаляар шагнагдаа һэн. Даширабдан Лодоев отделениин командир, сержант Гребенюгтэй 30 немецүүдые баряанда абаа, тиигэжэ тэрэ хоёрдохёо «Шэн зоригой түлөө» медаляар шагнагдаа бэлэй.
Венгридэ Балатон нуур, Секешфехервар хото шадар илангаяа шанга, дошхон хатуу тулалдаанууд болоо. Эндэ баһал полкын хэлхеэ холбоошод шалгараа. Тэдэ ганса найдамтай хэлхеэ холбоо хангаа бэшэ, харин хёрхо мэргэнээрээ дайсадай хэдэн дот һалгаа. Тиигэжэ нютаг солдаднай «Шэн зоригой түлөө» гэһэн 3-дахи медальда хүртөө бэлэй.
Даширабдан Лодоев дүрбэдэхи медаляа 1945 оной апрель һарада Австриин түб хото Венэ сүлөөлхэдөө абаһан, «1945 оной апрелиин 6-һаа 13 болотор Венэ хото болон шадарынь добтолгын байлдаануудта нүхэр Лодоев зоригтой, шадабаритай байһанаа харуулаа. Үйлсын хатуу байлдаануудта Лодоев саг соогоо хэлхеэ холбоотой болгожо, батарейн командирта буугай һүрэһэн газарта захиралтануудые үгэхэ арга боломжо олгоо, тиигэжэ ябаган сэрэгэймнай урагшаа ошоходо һаалта хэһэн дайсад һалгагдажа, сэрэгэй даабари дүүргэгдэхэ аргатай болоһон. Сэрэгэй захиралта дүүргэхэдээ, шадабари болон шэн зориг харуулһанайнгаа түлөө «Шэн зоригой түлөө» медаляар шагнагдаба» гэжэ шагналайнь хуудаһанда бэшээтэй байдаг юм.
