Февралиин 10-да Россида Дипломатическа хүдэлмэрилэгшын үдэр тэмдэглэгдэдэг. Энэ үдэрөөр дашарамдуулан, дипломадай ажал тухай хөөрэхэмнай.
ТҮҮХЭҺЭЭ
1549 оной февралиин 10-да Россиин түрүүшын гадаадын политикын албан газар - Элшэдэй захиргаан (Посольский приказ) бии болоһон. Россиин Президент В.Путин Гадаадын хэрэгүүдэй министерствын (Министерство иностранных дел) 200 жэлэй ойн баяр ёһололдо Дипломатическа хүдэлмэрилэгшын үдэр февралиин 10-да тэмдэглэхэ тухай зарлиг гаргаһан байна.
ПОСОЛЬСТВО БА КОНСУЛЬСТВО
Посольство гээшэ нэгэ гүрэнэй зүбшөөлөөр ниислэл хотодонь байгуулагдаһан хари гүрэнэй түлөөлгэтэ эмхи болоно. Жэшээнь, Монголдо Россиин нэгэл посольство бии, тэрэнһээ гадна Эрдэнэт ба Дархан хотонуудта Россиин генеральна консульствонууд ажалладаг. Консульствонууд энэ гүрэндэ ажаһуудаг россиянуудта, мүн энэ хото ерэһэн эрхэтэдтээ туһа хүргэдэг.
Зураг дээрэ: Улаан-Үдэдэ оршодог Монголой консульство.
БУРЯАДУУД – ДИПЛОМАДУУД
Буряадуудай дунда урданһаа хойшо хэлэ бэшэгтэ бэрхэ, эрэлхэг зоригтой дипломадууд олон байһан. Тэдэ Эсэгэ оронойнгоо хүгжэлтэдэ ехэ хубитаяа оруулһан шуу. Нэрлэбэл, Пётр Бадмаев, Агван Доржиев, Шодо Больтиригой, Буда Рабданов, Владимир Саганов, Цыден-Еши Цыдыпов, Цогто Бадмажапов г.м.. Мүнөө үедэ хүршэ Монгол орондо генеральна консулнуудай ехэ харюусалгата ажал Рыгзын Ракшаевич Ракшаев, Александр Цыденешиевич Доржиев ябуулнад.
ХААНА ДИПЛОМАДАЙ МЭРГЭЖЭЛ ШУДАЛДАГ БЭ?
Дипломадай мэргэжэл шудалдаг эгээл мэдээжэ дээдэ һургуули хадаа Москвагай гүрэнэй уласхоорондын харилсаанай дээдэ һургуули (МГИМО) болоно. Энэ нэрэтэй түрэтэй дээдэ һургуулида 2016 ондо Дулдаргын 1-дэхи дунда һургуули алтан медальтай дүүргэһэн Наталья Рабжинова ороһон байна. Тэрэ политологиин факультедтэ «дэлхэйн политика» гэһэн шэглэлээр һурана, англи ба немец хэлэнүүдые үзэдэг. Наталиин хэлэһээр, энэ дээдэ һургуулида хамта 12 буряадууд һурана. Сентябриин 1-дэ Сергей Лавров 1-дэхи курсда орогшодто баярые хүргөөд, лекци уншаа бшуу. Үхибүүдтэ Наталиин захяа: «Өөрөө оролдохо, ном үзэхэ, табиһан зорилгонуудаа бэелүүлхэ, Эсэгэ орондоо туһатай хүн болохо хэрэгтэй».
Дэлгэрэнгыгээр 6-дахи дугаарта.
