Буряад зон хэр угһаа мал һүрэг үдхэжэ ябаһан. «Мал хараха - ама тоhодохо» гэжэ дэмыдэ хэлсэдэггүй. Малтай хүн хэдынэйшье сагта үлэсхэлэн хооhон байгаагүй. Зүгтөө элдин дайдын ашаг шэмээр табан хушуун мал арьбажадаг гэжэ бү мартая.

 

Ц.Балдоржиев (баруун талаһаа түрүүшын рядта 2-дохи зогсоно), А.Теуважуков, Ц.Даширинчинов, Г.Стафеева ба Догойн механизаторнууд хабарай тарилгын зүблѳѳндэ. 1987 он.

 

Мүнөөшье атарлан бэлшэhэн адуу малаа тобир тарганаар ондо оруулхын тула заабол үбһэ хулһа даамайханаар бэлдэхые оролдодогбди. Теэд шэрүүн уларилтай Үбэр Байгалай хизаарта зунай эхин, дунда һарануудта хура бороо багаар орожо, шанга наранай элшэ доро ургамал ногоон набшыжа, үндэр ургаса абахын аргагүй байдаг. Имагтал иимэ ушарһаа газар дайдамнай шарлан харагдажа, гол горход хатанги, оршон тойронхи гандуу, хуурай байдагынь эли. Тиимэһээ байгаалиин уларилһаа дулдыдангүй, ямар аргаар нуга сабшаланаа һайжаруулхаб, яагаад ногооной ургаса дээшэлүүлхэб гэхэ мэтэ орёо асуудалнууд гаранал даа. Анхан совет үедэ тойрогой колхоз бүхэндэ малай хоол хошо, үбhэ тэжээл бэлдэлгын тусхай цехүүд хүдэлдэг, газар һайжаруулгын хүдэлмэринүүд хэгдэдэг байһан. Малай үбhэ тэжээл бэлдэлгын үндэhэ hууриин (кормовая база) асуудал шиидхэнгүйгөөр, хони малаа арьбажуулхань хэсүү бэшэ аал?

Догой нютагта ахамад агрономоор олон жэлэй туршада ажаллаһан, нютагайхидтаяа суг хамта баян ургаса хуряалсаhан ажалай ветеран Цыгмитжаб Балдоржиев асуудалнуудтамнай харюусаба.

- Цыгмитжаб Бальжиевич, нютагтамнай ган гасуурай тохёолдоходо, ганса хүхэ номин тэнгэри өөдэ хараад байха бэшэ, сабшалан дээрээ гаража, ногооной hайн ургаса абахын тула ямар ажал хэхэ ёhотойб?

- Аба эжын хэлсэдэгээр, урдын сагта баhал ган халуун болодог һааб даа. Элинсэг хулинсагнай Энгидэй, Үлирэнгэ гэхэ мэтэ үргэн ехэ голнууд шадархи элдин дайда руу зөөдэл хэжэ, малаа ядамаргүй таргалуулаад, нютагаа бусадаг байhан. Тиихэдэ хамтаралай болоодүй, үмсэ байха сагта тайшаа зайhанууд «сабшалангаа хорёологты!» гэжэ шанга захиралта үгэдэг, нютаг нютагуудта ехэ тээлнигүүд хэгдэдэг байгаа. Агынхид тэрээн соогоо нэгэш мал оруулдаггүй, ургаһан ногооень сабшажа абадаг hэн бэзэ. Мүнөө манай тойрог дотор иимэ ажал ябуулагдана. Догой нютагта бэрхэ үмсынхид сабшаланаа хорёолжо эхилээ. Федеральна харгыгаар ябахада, “Победа” ажахы таряаланаа һайнаар хорёолһон байгша. Барилгын модо, столбшье ой сооhоо отолжо абахань бэлэн бэшэ. Тиигэбэшье энэ ажал ябуулая, сабшаланаа хони малаар бү гэшхүүлэе.

 

Дэлгэрэнгыгээр 5-дахи дугаарта.

You have no rights to post comments