Ага нютагай үзүүр хүбүүдэй нэгэн, «Буряад үнэн» үндэһэн хэблэлдэ үни удаан саг соо үнэн сэхээр, амжалта түгэс ажаллаһан, удаань Буряад республикын Президентын болон засаг түрын Захиргаанай дэргэдэ Гүрэнэй оршуулгын албан хүтэлбэрилһэн, талаан бэлигтэй сэтгүүлшэн, ажалай ветеран Бата-Мүнхэ Жигжитовэй «Хоёр үндэрэй хормойдо» гэhэн номтой танилсуулга Забайкалиин хизаарай Ц.Жамцараногой нэрэмжэтэ номой сангай хизаар ороноо шэнжэлэлгын таhагай танхим соо октябриин 13-да үнгэргэгдэhэн байна.
Б-М. Жигжитовэй шэнэ ном
Энэ уулзалгада Бата-Мүнхэ Жигжитовичэй түрэл тоонто Шандали нютагайхид, суг хамта үндыһэн, хүдэлhэн, танил нүхэдынь, түрэл гаралынь, мүн Агын 1-дэхи дунда hургуулиин hурагшад хабаадаа. Ушар юуб гэхэдэ, «Хоёр үндэрэй хормойдо» гэhэн ээлжээтэ уран зохёолынь ульгам буряад хэлэн дээрэ бэшэгдэжэ, олоной һонирхол, анхарал татама, һайхан, удха шанартай, зузаан гадартай, һайнаар барлагдаһан ном болоо бшуу. Энэ барюубшатай номой олон толилолгонууд «Оролто үгэ», «Шажан мүргэл, санаартад тухай», «Эрдэм һургуули - эрхим баян», «Дайнай гал дүлэн соогуур», «Эрдэм ухаанай орьёл өөдэ», «Россиин журналистикын одод» ба «Түрэл нютагтаа түрүү зэргэтэй» гэһэн 7 бүлэгтэ оруулагдаа. Баян дүршэлтэй сэтгүүлшэн Б-М.Жигжитов буряад угсаата арадай алдарта, эрхим хүбүүд басагадай хуби заяан, намтар, аша габьяаень, Эсэгэ оронойнгоо дабшахы, гайхамшагта замыень уран һайханаар зураглажа, хойто үеынхидтэ шадамар бэрхээр дамжуулжа шадаа. Тус номынь Бүгэдэ буряадай «Алтаргана-2016» фестивалиин номуудай мүрысөөнэй «Уран hайханай ном» янзада шалгаран, авторынь лауреадай үндэр нэрэ зэргэдэ хүртэhэн байна.
Тиимэһээ Улаан-Үдэ хотодо үнгэргэгдэһэн номуудай мүрысѳѳндэ жюриин гэшүүнээр ажаллаhан, Россиин Федерациин соёлой габьяата хүдэлмэрилэгшэ Батор Шагдаровта түрүүн үгэ үгтэхэдэнь, иигэжэ хэлэбэ: «Энэ конкурсдо уран шүлэгэй, улас түрын, баримтата, сэтгүүлэй жанрай уран бүтээлнүүд олон, харин туужа, роман гэхэ мэтэ прозо, уран hайханай жанрай зохёолнууд үсѳѳн байгаа. Жюриин гэшүүдэй hанамжаар, Ага нютагай хоёр түлѳѳлэгшэдэй номууд hайшаагдажа, Бата-Мүнхэ Жигжитов лауреадай нэрэ зэргэдэ хүртѳѳ. Залуу үетэндэ, Агын нэгэдэхи һургуулиин үхибүүдтэ хандажа, шадаа-ядаашье hаа буряад уран зохёолнуудые уншажа, удха шанарыень һайнаар ойлгохые оролдогты, хүн болохо ябадалаа мүнөөнһөө бэлдэжэ, бодомжолжо, ном һударта улигтай, hайнаар hурагты гэхэ байнаб». Номтой танилсуулгын үедэ.
Дэлгэрэнгыгээр 42-дэхи дугаарта.
