Түбэй телевидениин “Россия-1” каналда “Танцуют все” гэһэн федеральна хэмжээнэй хатарай мүрысөөндэ “Байгал” театрай абьяас ехэтэй хатаршад ялас гэмэ илалта туйлажа, сая түхэриг шанда хүртэһэн байна.
Тэдэнэр Москва хотодо 2 һарын туршада байжа, хатарай шанга урилдаанда хабаадажа, ороной эрхим хатарай 11 бүлгэм соо шалгаран гараа бшуу. Тиихэдээ элдэб янзын хатар бэлдэжэ, абьяастайгаар гүйсэдхэхыень бидэ сэнхир экран дээрэ булта баясан хараа һэмди. Бальна хатараар Дэлхэйн ба Европын хэдэн дахин чемпион Тюмениин Формейшн “Вера” ба Красноярскын “Evolvers” хатарай бүлгэмүүд 2-дохи ба 3-дахи һууринуудые эзэлээ. Түрэл нютагаа суурхуулһан хатаршадые “Байгал” театрай директор, Россиин Федерациин искусствын габьяата ажаябуулагша Дандар Бадлуев хүтэлбэрилэн ябаа. Уран һайханай хүтэлбэрилэгшэнь, Буряадай арадай артист Жаргал Жалсанов Агын аймагай Будалан нютагай хүбүүн юм.
«Байгал» театрай хатаршад мүрысөөнэй һүүлээр. Москвада. Зураг дээрэ: зүүн гарһаа доодо таладань - Анастасия Дашинорбоева, Валентина Юндунова, Жаргал Жалсанов, Виктория Дондокова, Чагдар Будаев. Дундань - Сэсэгма Даиндарова, Фёдор Кондаков, Чингис Цыбикжапов, Филипп Ойнаров, Тумун Раднаев, Алексей Раднаев. Дээдэ таладань - Даба Дашинорбоев, Евгений Чойдонов, Арюна Цыдыпова, Екатерина Осодоева, Инна Сагалеева, Юлия Замоева, Донара Балданцэрэн, Галина Бадмаева.
Мүнөө зун алдарта ойгоо угтахаяа байhан «Байгал» театрай хатаршад федеральна шоу мүрысөөндэ түрүүшынхеэ хабаадажа, Россиин телехарагшадта бүхы шадабарияа, бэлигээ харуулжа шадаа, өөhэдтөө туhатай hургуули гараа гэхэдэ, алдуугүйл даа.
Бидэ эрхим хатаршадые телефоной утаhаар амаршалаад, уран hайханай хүтэлбэрилэгшэ, нютаг хүбүүн Жаргал Жалсановта хандажа, Москва хотодо ямар ябажа ерэбэбта гэһэн асуудал табихадамнай, иимэ харюу үгөө һэн: «Концерт-наада тайзан дээрэ харуулдаг бидэндэ телевидениин конкурсдо хабаадаха гээшэ тад ондоо, hонин байгаа. «Танцуют все» түhөө түсэбэй янза бүхэндэ хамаг юумэ түргэн hэлгүүлхэ, буряад хатарhаа гадуур ондоо шэглэлэй хатарнуудые гүйсэдхэхэ дүримтэй hэн. Энэ хэрэг хүндэшэг, стресстэ орохоор лэ байгаа. Нүгөө талаhаа харахада, олон хүнүүдтэй уулзаха, суг хүдэлхэ, танилсаха, буряад арад хэд, юуд гээшэб гэжэ сэнхир экран дээрэ тодорхойгоор хөөрэхэ, харуулха арга бидэндэ тудалдаа. Хун шубуун гарбалтай хори буряадби гэхэдэм, ямар гоё домогтой зон гээшэбта гэжэ хүтэлэгшэ Ольга Шелест хэлээ hэн. Ганса буряадууд бэшэ, ородууд манай хатараар, урлалаар hонирхоо. Жюриин гэшүүн Алла Сигалова ехэ баян соёлтой, мүнөөнэй мэргэжэлтэ hургуулитай, үндэр хэмжээнэй бэлэдхэлтэй байнат гэжэ тэмдэглээ hэн. Дээгүүр сэгнэлтэ үгэхэдэнь, ажаллахада урматай, удхатай болоод байна. Бидэ хатуу шалгалта гаража, хэнhээшье дутуугүй хатарха, конкурсдо хабаадаха зон байнабди гэжэ мэдэрээбди. Би түгэсхэлэй хатар найруулан табихадаа, конкурсдо үзэhэн, hураhан хатарнуудаа бүридхэжэ, буряад хүгжэм, маягта тааралдуулааб ». Анхан Жаргал Жалсанович Москва хотодо ехэ түhөө түсэбүүдые бэелүүлжэ, Европын театрай фирмэдэ 5 жэлэй туршада хүдэлhэн намтартай.
Театрай зонхилогшо (администратор) Гомбо Дамбиев иигэжэ мэдээсээ бэлэй: «Россиин телевидениин 2-дохи каналай урилгаар, манай театрай хатаршад шэнэ түһөө түсэбтэ хабаадаа. Хатар найруулан табигшадые нэрлэбэл, театрай директор Дандар Бадлуев, уран hайханай хүтэлбэрилэгшэ Жаргал Жалсанов ба мүрысөөнэй үедэ хореограф байhан Арсалан Санданов (театраймнай балетмейстер-найруулагша) гэгшэд тус тустаа хатарнуудые зохёон табяа юм.
Дэлгэрэнгыгээр 20-дохи дугаарта.
