Агын аймагай Согто-Хангилай «Түншэ» ажахые даагша Баир Дондоков:
   - Эбэртэ бодо мал хүдөө талаар өөһэдөө бэлшээд ерэдэг гээшэ. Хонидой хойноһоо хаража, ходо адуулжа байха хэрэгтэй. Хонин – ажаллууhа ехэтэй амитан. Жэлэй дүрбэн сагта hайн бэлшээридэ ябуулха хэрэгтэй. Үхэр энэ талаар амар гэжэ хэлэхэ байнаб.
   Сагаан Үбгэн газарта 350 гаран эбэртэ бодо мал үсхэбэрилнэбди. Даашымнай мал бэлшээриин хүсөөр тобир тарган, ондо һайн ородог. Мал бэлшээридэ ябаагүй һаа, өөдэлхэгүй бшуу. Сагаан Үбгэнэй тала дайда мүнөө үбэл зузаахан саһан хүнжэлөөр бүрхөөгдэнхэй. Малнай хушуугаараа саhа ираад, хэлээрээ орёожо хагдан эдидэг. Газаа хүйтэн байбашье, мал бэлшээридэ ябажа, эдихэ юумэеэ олоно. Тиихэдээ хүсэ шадал ородог. Абамнай иигэжэ хэлэдэг һэн: «Үхэр гээшэ һалхигүй, наруули газарта садатараа бэлшээд, гэртээ бусадаг юм».
   Мүнөө хүйтэндэ эбэртэ бодо малда, илангаяа түрэхэ үнеэдтэ үдэрэй хоёр дахин үбһэ, зелёнко, талха тараажа үгэнэбди. Хэзээшье, гурбан зуу гаран үхэртэ үбһэ асалаад үгэхэнь хүндэ. Тиихэдэнь трактораар рулонтой үбһэ тараажа үгэдэгбди. Ооһорыень тайлахада, малнай үбһэеэ тойроод эдижэ эхилшэхэ. Үглөө бүхэндэ эбэртэ бодо малаа бэлшээридэ гаргахын урда тээ үбһэ һайса эдюулдэгбди. Үбэлдөө хоол ехээр үгэхэ хэрэгтэй. Үглөөнэй 8 сагта үүрэй сайгаадүй байхада, малдаа үбһэ үгэнэбди. Дан эртэ гэжэ зарим малшад хэлэдэг аабза. Удаан байлгахада, мал унтаридаа шээхэ. Тэрэнь хүрөөд, бэеыень хайраха. Үглөөгүүр һайса үбһэ эдюулээд, уһалхыень худаг руу туудагбди. Үхэр уһалхадаа, бэедэнь халуун орожо, бэеэ һэжэрээд, бэлшэхээ гарадаг. Сагаан Үбгэн газарай хүндыгөөр наруули газараар малнай садатараа бэлшээд, наранай нилээн доро ороһон хойно гэртээ бусадаг. Хонолгодо дал руугаа орохын урда тээ баһал үбһэ һайса эдидэг. Дабһа, талха үгэдэгбди, харин үдэшэлэн малаа уһалдаггүйбди. Һүни дэбдихэртээ шээхэ.

You have no rights to post comments