Агын дасанда эмхидхэгдэһэн “Аба эжын хэлэн гамтайл!” мүрысѳѳнһѳѳ тэмдэглэл

Россиин буддын шажанай заншалта сангхын дурадхалаар “Аба эжын хэлэн гамтайл!” гэһэн буряад хэлэ болон буддын шажанай ёһо гуримуудые мэдэлгээр мүрысѳѳн Агын дасанай Дуйнхор дуган соо октябриин 29-дэ эмхидхэгдээ.

БАГШАНАРТА СОЛО ДУУДАХААР

Энэ мүрысѳѳн заншалта болонхой, жэлэй хоёр удаа Буряад хэлэнэй һарын хэмжээндэ үнгэргэгдэдэг. Зорилгонь хадаа хүүгэдэй, залуушуулай буряад хэлэ үзэхыень дэмжэлтэ, түрэл хэлэн дээрээ хѳѳрэлдэжэ, һанаһанаа зүб мүрѳѳр найруулжа һуралга, эхэ эсэгын абажа ябаһан ёһо заншал хүүгэдэй зүрхэ сэдьхэлдэ нэбтэрүүлэн ойлгуулга болоно.

Энэ удаашье мүрысѳѳн гол зорилгоёо бэелүүлээ. Гансал халаглаха юумэн – мүрысѳѳ харагшад хомор байгаа. Буряад хэлэнэй багшанар асари ехэ бэлэдхэлэй ажал ябуулжа, таба-табан үхибүүдые энэ мүрысѳѳндэ бэлдэхэдээ, ямар ехэ мэдэсэ олгуулжа шаданаб гэжэ гайхамаар.

Агын гимназиин түлѳѳлэгшэд.

Бүхыдѳѳ мүрысѳѳндэ арбан можо (команда) хабаадаа. Жээрэбэй ёһоор, эгээл түрүүн Шулуутайн һурагшад (бэлдүүлһэн багшань – Билигма Дашиевна Дашиева) гараа. Удаань Могойтын гурбадахи һургуулиин ахалагша ангинуудай һурагшад (багшань – Светлана Ринчиндоржиевна Кожина); Үбэр-Аргалиин үхибүүд ( багшань – Юмжидма Арьяновна Дашинимаева); Будаланай багашуул - гол түлэб эхин шатын ангинуудай һурагшад ( багшань – Сарюна Цыренжаповна Аюрова); Гүнэйн һурагшад (багшань – Баирма Бальжинимаевна Дылгырова); Агын гимназиинтернадай ахалагша ангинуудай һурагшад (багшань – Цыцыгма Самбуевна Жанчипова); Сагаан-Уулын эдиршүүл (багшань – Хишигто Эрдынижаповна Жигзымаева); Сахюуртын һурагшад (багшань – Билигма Баторовна Болотова); Һүдэнтын һурагшад (багшань – Мыдыгма Ринчиновна Балданова); анха түрүүшынхеэ Угдаанай дунда һургуулиин түлѳѳлэгшэд (багшань – Надежда Балдановна Жалсабон) хабаадабад. Тиихэдэ Забайкальск тосхоной һурагшад ямар юумэн болодог юм гэжэ танилсангаа харахаяа ерэһэн байна. Тэдэнэр удаадахи мүрысѳѳндэ заабол хабаадахабди гээд найдуулба. Һурагшадай хаба шадалыень Забайкалиин хизаараар дид хамба Цырен Дондукбаев түрүүтэй ламанарһаа болон буряад хэлэ, ёһо заншал мэдэхэ мэргэжэлтэдһээ бүридэһэн жюри сэгнэһэн байна.

ДОНШУУР МААНИ – СЭЭЖЭЭР

Мүрысѳѳн табан шатаһаа бүридѳѳ, шата бүхэн арадаймнай үндэһэн нааданда шадүн согсолходоо, һайнаар даабарияа дүүргэһэн можонуудые тэмдэглээ.

Дэлгэрэнгыгээр 44-дэхи дугаарта.

You have no rights to post comments