Буряад уран зохёолой порталай редактор, «Уран хүн» гэжэ буряад зохёолой, уран зурагай сайт эмхидхэгшэ Баира Бальбуровагай Агада үнгэргэгдэһэн Буряад хэлэнэй һарын түгэсхэлэй эрдэмэй-практическа конференцидэ хабаадахаяа ерэхэдэнь, хөөрэлдөө эмхидхэбэбди.
Б.Бальбурова (зүүн гарһаа).
- Баира Цыден-Ешиевна, Буряад орондо түрэл хэлэеэ хүгжөөхэ талаар ямар ажал хэгдэнэб?
- Буряад орондомнай түрэл хэлэеэ үргэхэ гэжэ яhала олон хэмжээ ябуулганууд үнгэргэгдэдэг. Урагшаа hанаатай залуушуул интернедэй талмайгаар буряад хэлэнэй онлайн толи бүридхэнэ. «В контакте», «Одноклассники», «Фейсбук», «Вайбер» г.м. социальна талмайгаар буряад хэлэ, соёл дэмжэдэг олон бүлгэмүүд байгуулагдана, тэндэ олон хүн хабаадана. «Буряад үнэн» hонин 5 мянгаад тиражтай, өөрын сайттай, уран зохёолой «Байгал» сэтгүүл мянган хэһэгээр хэблэгдэдэг. Гэбэшье энэ сэтгүүл өөрын сайтгүй, урдынхяар хүдэлдэг гэхэдэ, буруу бэшэ. Мүнөө саг ондоо болоо, хүдөө талааршье арад зон булта шахуу гэртээ компьютертай, интернедэй хүсөөр дэлхэйдэ юун боложо байнаб гэжэ мэдэхэ аргатай болоо. Холо, хари гүрэнүүдтэшье ажаhуудаг буряадууд түрэл хэлэн дээрээ уншаха, нютагайнгаа hонин дуулаха дуратай байдаг. Тиимэhээ буряад уран зохёолой сайт маанадта тон хэрэгтэй болоод байна гэжэ hанаад, «Уран хүн» гэжэ буряад зохёолой, уран зурагай сайт эмхидхэбэбди.
- Энэ сайтын гол зорилго ямар бэ?
- Росси гүрэндэ ород хэлэн дээрэ зуугаад шахуу сайт бии, харин манай арадай мүнөө сагай зохёолшодой бүтээлнүүдээ табижа, олондо уншуулжа, нэрэеэ алдаршуулжа байха сайт үгы байгаа. Буряад хэлэн, уран зохёолшье хүндэ байдалда оронхой гэжэ булта мэдэнэбди, теэд уйдажа байнгүй, тэрэнээ абарха гэжэ хүн бүхэнэй хубитаяа оруулжа байгаа hаань, һайн hэн. Түрэл хэлэеэ алдангүй байял гэжэ тэмсэхын хажуугаар уншаһанаа ойлгожо, бэшэжэ туршаха, тиигээд буряад хэлэн дээрээ уран зохёол зохёожо, тэдэ бүтээлнүүдээ бүхы дэлхэйгээр суутай болоторнь дэлгэрүүлжэ байха ёһотойбди. Арадайнгаа уран зохёол хүгжөөжэ, анханай оюун бэлиг – аман зохёолоо үндэр дэлисэдэ гаргажа, ондоо хари хэлэнүүд дээрэ оршуулжа, ганса Росси гүрэндэ бэшэ, бүхы дэлхэйгээр суута болгохо арга бэдэрхэ гэһэн зорилготойбди.
Дэлгэрэнгыгээр 47-дохи дугаарта
