Энэ хэшээл нютагай наһатайшуулай зүблэлэй (түрүүлэгшэнь – Баир Даржаев) буряад хэлэеэ хүгжөөхэ, ёһо заншалнуудаа дэлгэрүүлхэ зорилготойгоор эмхидхэжэ байһан хэмжээ ябуулгануудай нэгэн болоо. Хэшээл эмхидхэгшэдэй нэгэн – һургуулиин захиралай хүмүүжүүлгын ажалай талаар орлогшо Билигма Ринчиновагай тэмдэглэһээр, Очир Бадмаевичай хэшээл һурагшадай һонирхол ехэ татаа.
   Эрын гурбан нааданда илагшадта яагаад соло дуудагдадаг бэ гэжэ бодото дээрээ харуулагдаа: тамирай мастерта кандидат, 11-дэхи ангиин һурагша Доржо Ортонов һур харбажа, солодо хүртөө; 10-дахи ангида һурадаг Бальжинима Жамбалов Шулун Цыренов хоёр бүхэ барилдаа харуулжа, илагшадань Очир Бадмаевич соло дуудаа; урилдаанда түрүүлжэ ерэһэн Алтан Шагай хүлэгэй фото-зураг слайд дээрэ харуулагдажа, тэрээндэ баһал соло дуудагдаа.
   Хэшээлэй үргэлжэлэлдэ хүбүүдтэ солын үгэнүүд тараагдаа. Соло бүхэниие гүйсэдхэгшэ өөрынхеэрээ янгалан дууладаг, өөрынгөө үгэнүүдые нэмэдэг гэжэ һурагшад мэдэхэ болоо. Мүн яагаад зүбөөр хутагаяа буулгахаб, яагаад дэгэл тоб-шолхоб, тайлахаб, солодо хүртэжэ байгша дэгэлэйнгээ захын ба дээдэ тобшонуудые тайлаад байха ёһотой – үреэл-магтаалынь шэнгэхэ юм.
   Түгэсхэлдэнь хүбүүд соло дуудажа туршаа, зариманиинь хүсэд һайнаар янгалжа байба. Тиимэһээ эдир баршадай конкурс май һарада соносхожо, илагшадынь Очир Бадмаевичтай суг мори урилдаанда, «Зунай нааданда», «Бабжын нааданда», «Алтарганада» соло дуудалсаха гэжэ түсэблэгдэбэ.

You have no rights to post comments