Энэ удаа Ага-Хангил нютагай түрүү адуушан Болот Ринчиновэй бууса дээрэ даага дэллээнэй һайндэр боложо, нютагай «Булагта» аман зохёолой бүлгэмэйхид (хүтэлбэрилэгшэнь – Х.Чимитова) һайхан үреэл, аялга дуунуудаа зэдэлүүлжэ, алда хадагаар айлшадые угтаа бшуу. Мүн түрэл нютагаа суурхуулһан хурдан хүлэгүүдэй нэмэргэнүүд, кубок, диплом шангууд, ажахын туйлалта, моришод, шодоогууд тухай мэдээ, альбомууд үргэнөөр дэлгээгдээ.
   Могойтын аймагай Зүблэлэй түрүүлэгшэ А.Дондоков амаршалгын үгэ хэлэжэ, ага-хангилайхидта сэнтэй бэлэг баряа һэн. Агын тойрогой мори урилдаанай федерациин түрүүлэгшээр олон жэлэй туршада ябаһан В.Цыцыков Ага-Хангилай дэбисхэр дээрэ хоёрдохёо үнгэргэгдэжэ байһан даага дэллээнэй ушар удхыень хөөрэжэ үгөө.
   Тойрогой шадалтай, шамбай хүбүүд даага бугуулидажа баряад, дэлһэ һүүлһээнь отолжо абаха дүримтэй байгаа. Нютаг нютагуудай дүрбэ-дүрбэн хүнһөө бүридэһэн, дүн хамта 19 можо хабаадажа, Догойн 2-дохи можын хүбүүд тон түргөөр даага дэллэжэ, түрүү һуурида гараа. Зугаалайн 2-дохи ба Ага-Хангилай 1-дэхи можонууд удаадахи шангай һууринуудые эзэлжэ, диплом ба мүнгэн шангуудта хүртэбэ. Даага дэллээндэ 69 һуршад зураахай дээрэ гаража харбаа бшуу. Сахюурта нютагай Балдан Болотов абарга мэргэн болоо. Сагаан-Уула нютагай Батор Бадмаев бүхэ барилдаагаар абарга бүхын солодо хүртэбэ. Мори урилдаанай 1600 метрэй зайда Догойн морин (эзэниинь – Б.Шагдаров) урдалан ерээ. Ага-Хангил нютагай М.Цыбикжаповай хүлэг (шодоогынь – Д.Жалсараев) ба 82 наһатай Арсалан Аюшиевэй Унагаадай морин хатарай мүрысөөндэ шалгараа. Догой нютагай Мунко Гармажапов тон олон һээр хухалаа. Удаадахи 2020 оной тойрогой даага дэллээн Догой нютагта үнгэргэгдэхэ юм.

You have no rights to post comments