А.Бальжинимаев.
- Артур Кимович, Ононой аймагай эмнэлгын газар хэзээ байгуулагдаһан бэ? Түүхэһээнь нэгэ бага хөөрэжэ үгыт.
- Түүхыень харахада, аймагай тон түрүүшын больница 1936 ондо үүдэеэ сэлиһэн юм. Холын тэрэ үедэ түрүүшын ахамад врач Юрий Сурковой хүтэлбэри доро эмшэд Дээдэ Саһашада багахан модон байшан соо ажалаа ябуулдаг байһан. Тэрэ үеэр гурбан койкотой нарайлалгын таһаг ба терапевтическэ, хирургическа үбшэнтэдтэ арга хэхэ арбан койкотой таһаг хүдэлдэг байгаа. Мүн тиихэдэ больницын бүридэлдэ «Дурулгуй», «Ангатуй» руднигуудта хоёр врачебнэ участок, Ималха, Хубхай һуурингуудта хоёр участково больница, Тудхалта, Бүйлөөһэн, Новая Заря, Чиндант гэхэ мэтэ һуурингуудта фельдшерскэ пунктнууд ородог һэн. 1956 ондо аймагай эмнэлгын эмхи Дээдэ Саһашаһаа Доодо Саһашада шэнээр баригдаһан байшан руу зөөһэн. Олон жэлэй хугасаа соо аймагай больница нилээд хүгжөө, олон ахамад врачнууд һэлгээ һааб даа. Владимир Степанов гэжэ ахамад врачай хүтэлбэрилхэ үедэ аймагай больница бэхижээ, һайжараа. Жэшээнь, түргэн туһаламжын, пищеблогой гэхэ мэтэ хэдэн байшангууд, гараж баригдаа, котельниин шэнэдхэн һайжаруулагдаһанай ашаар врачнуудта болбосон түхэлтэй квартиранууд ашаглагдаа. Аймагай больницые 1980-1990 онуудта хүтэлбэрилһэн Валерий Бусоедовэй аша туһаар аймагай элүүрые хамгаалгын эмхинүүд нарин мэргэжэлтэ эмшэдээр хангагдаһан, материально-техническэ бааза һайжарһан байна.
- Ононой аймагай түб больницын мүнөөдэрэй байдалтай танилсуулыт даа. Тус эмхиин ахамад врачаар хэр үнинэй хүдэлнэбта?
- Би 2003 ондо Шэтын эмнэлгын академиин оюутан боложо ороод, 2009 ондо дүүргэһэн байнаб. Тиигээд арбаад жэлэй туршада Ононой аймагай түб больницада врач-стоматологоор хүдэлөөб. Тиигэжэ байтараа, 2018 ондо ахамад врачай уялга дүүргэжэ эхилээд, тэрэл оной октябрь һарада ахамад врачаар томилогдоһон байгдана. Ѳѳрѳѳ Саһашынби, гэртэхимни Новая Заря нютагһаа гарбалтай.
Манай больницада поликлиникэ, түргэн туһаламжын, терапевтическэ, гинекологическа, хирургическа, инфекционно таһагууд бии. Ами аминдаа байшангууд соо нарайлалгын ба хүүгэдэй таһагууд ажалаа ябуулдаг. Ононой аймагай түб больницын мэдэлдэ арбан зургаан фельдшерско-акушерскэ пункт болон Новая Заря, Новый Дурулгуй һуурингуудта хүдөөгэй врачебнэ амбулаторинууд хүдэлдэг юм. Материально-техническэ бааза һайн.
Мүнөө үедэ дүн хамта 165 хүн ажаллана. Тэдэнэй хорин нэгэниинь врачнууд, фельдшер, акушерка, эмнэлгын сестранууд гэхэдэ, ерэн гурбан хүн болоно. Врачнуудай дунда нэгэниинь нэгэдэхи, гурбаниинь дээдэ категоритой, харин фельдшер, акушерка, эмнэлгын сестрануудай дунда долоон хүн нэгэдэхи, арбан дүрбэн хүн хоёрдохи ба гушан нэгэн хүн дээдэ категоритой. Табан жэлэй нэгэ дахин ажалтаднай дистанционно аргаар мэргэжэлээ дээшэлүүлжэ байдаг, гансал хирургида хабаатай хүдэлмэрилэгшэднай очно аргаар Шэтын гүрэнэй эмнэлгын академидэ һуралсал гарадаг юм.
- Ононой аймагта эмнэлгын талаар үндэһэн түлэблэлнүүд, «Центры экономического роста» гэһэн социальна хүгжэлтын түсэб хэр бэелүүлэгдэнэ гээшэб?
- Үндэһэн түлэблэлэй «Здравоохранение» гэһэн программын хэмжээндэ 2020 ондо Хулһата нютагта бүхы түхеэ-рэлтэнүүдтэй шэнэ фельдшерско-акушерскэ пункт баригдаа, оршон тойронхи дэбисхэрынь болбосон түхэлдэ оруулагдаа. Гадна үнгэрэгшэ жэл хүүгэдэй поликлиникэдэ капитальна заһабарилга хэгдээд, техническэ талаар һайнаар зэмсэглэгдээ һэн. Үшөө тиихэдэ үндэһэн түлэблэлөөр түргэн туһаламжын гурбан авто-унаа үгтөө бэлэй. ЦЭР-эй программын хэмжээндэ дүрбэн залуу мэргэжэлтэд мүнөөнэй үеын болбосон түхэлтэй гэр байраар хангагданхай.
«Нормированный страховой запас Федерального фонда обязательного медицинского страхования» гээд шэнэ түхеэрэлтэнүүдээр хангалгада, бэшэшье зорилгонуудта мүнгэн зөөри һомологдодог юм. 2019-2020 онуудта ТФОМС-ын мүнхэлэлгын нөөсэ мүнгөөр бидэ наркозно-дыхательна, ИВЛ аппарадууд, кислородно концентратор гэхэ мэтэ үнэ сэн ехэтэй һайн түхеэрэлтэнүүдтэй болоо һэмди. Тиигэжэ 2020 ондо минута соо 50 литр кислород гаргадаг, нэгэ доро табан ИВЛ залгаха концентратор тодхообди. Мүн энэ түхеэрэлтын ашаар нарайлалгын, хүүгэдэй гэхэ мэтэ таһагуудта, интенсивнэ терапиин палатада кислород дамжуулагдаха аргатай. Иимэ хүсэтэй концентраторнууд Үбэр Байгалай хизаарай оройдоол 3-4 лэ аймагай больницануудта бии. Дулаасуулга, уһаар хангалга өөһэдөө даадагбди...
Дэлгэрэнгыгээр 9-дэхи дугаарта.
