Тус ажахын хүтэлбэрилэгшэ Дарима Дондоковагай хэлэһээр, хабарай һалхитай, хүйтэн байгаашье һаа, дүй дүршэлтэй малшадай аша оролдолгоор ажахынхид зуун хуби түл абажа шадаа.
Эхэ хонидые харууһалдаг залуу бүлэ Аюр Дондоковтоной буусада түл абалгын хаһа дүүрэбэ. Тэдэ 300 гаран малтай, зуун эхэ хонинһоо дунда зэргээр зуун хурьга абаа. Буусын эзэн Аюр Дондоков 20 гаран жэлдэ хони арьбажуулха хэрэгтэ оролдоһон Батоболот абынгаа эрхилһэн ажал үргэлжэлүүлнэ гээд тэмдэглэмээр.
Хамтын ажахынуудай хажуугаар үмсын ажахы хүгжэжэ байнхай. Жэшээнь, Табтаанайн дэбисхэр дээрэ оршодог Аса-Шэбэр гэжэ газарта залуу фермер Александр Арбалжинов үмсэдөө мяханай үүлтэрэй эбэртэ бодо мал үсхэбэрилнэ. Тэрэ нёдондо мал ажахы һая эрхилһэн фермер гээд 3 сая түхэригэй грантда хүртэжэ, МТЗ-82 трактор элдэб хэрэгсэлнүүдтэйнь хамта, УАЗ ашаанай унаа абаа, малайнгаа тоо толгой олошоруулаа. «Хоёрдохи жэлээ 10 гектар газарта обёос таринаб, мүнөө жэл зелёнко тарихаяа 20 гектар газар бэлдээб. Байгша ондо «корова-телёнок» шугамаар түрүүшынхеэ субсидида хүртэһэндөө баяртайб», - гэжэ А.Арбалжинов хөөрэһэн байна.
Бүхыдөө Агын Буряадай тойрогой хамтын болон фермерскэ ажахынууд дүн хамта 57708 – зуун эхэ хонин бүриһөө 87 хурьга абаһан байна.
