Тэрэ 30 наһа гүйсөөдүй малшадай хоорондо түл абалгаар эрхим дүн харуулһан байгаа. Мүн хизаарай хүдөө ажахын хүгжэлтэдэ горитойхон хубита оруулаа бшуу. Залуу хонишонтой танилсаһамнай, арба гаран жэлдэ малда ябана. Мүнөө гуша наһаяа һаял дабанхай хонишон ажалай дүршэл Батор Митупов, Цыренжаб  Пунцуков ба бусадһаа абаһан байгаа. Мүнөө болоходо, эдэ хонишодоор нэгэ зэргэ ябана бшуу. Наһаар залуушье һаа, ажалай баян дүршэлтэй хонишон ээлжээтэ түл абалгын хаһа эрхимээр дүүргээ юм. Буусань Могойтоһоо зүүн тээшэ оршодог «Яраама» гэжэ газарта оршодог. Газаагаа зайн галаар хүдэлдэг худагтай, хашаар соонь зайн гал татаатай, дулаан, хоолшье бии. Тэрэ бууса дээрэ нүхэртэеэ ажахынгаа нютагай үүлтэрэй гурбан зуу гаран толгой хони олон жэлдэ арьбажуулжа ябана. Түл абалгаар аймагайнгаа, мүн тойрогойнгоошье зуутан хонишодой тоодо ородог бэрхэ хонишон. Жэл бүри зуун эхэ хонинһоо зуун хурьга абадаг гуримтай. Нооһо хиргалгын үедэ Зорикто Баторовичай буусада харууһалагдадаг хонидһоо «сагаан алтан» дунда зэргэ 3,5-4 хиилээр жэгдэрдэг гээшэ. Сандылыковтанай буусын хонид жэл бүри Шэтэ хотодо үнгэргэгдэдэг Сибириин ба Алас Дурнын үзэсхэлэн-харалгада абаашагдадаг. Тэндэһээ элдэб медаль шангуудтай бусадаг. Залуу хонишон ажалай үндэр амжалтануудые туйлажа, ажахын, аймагай, тойрогой захиргаануудай зүгһөө грамота ба баярай бэшэгүүдээр нэгэтэ бэшэ урмашуулагдаһан. Зорикто Баторовичай хэлэһээр, мал ажаллаха талаар дүршэлтэйшье һаа, хизаарта, тойрогто үнгэргэгдэһэн семинарта хабаададаг гээшэ. Ажалай дүршэлтэй хубаалдахадаа, эхэ хонидоо орой намар үрэжүүлдэг. Эртэ үрэжүүлбэл муу. Ажахынуудай зарим малшадай эртэ үрэжүүлһэниинь, январиин хуушаар түрэжэ эхилээ бшуу. Энэ болохогүй гэжэ тэрэ тодорхойлно. Эртэ зун хонидоо хиргажа болохогүй. Нооһон гээшэ хүнгэн, «зунгаггүй» байха.  Июниин эсэс болотор хонид хайшалаатай, сентябрь һарада хонид илгаатай байха шухала. Эхэ хонидые ба хурьгадые ами амяарынь адуулжа, эхыень шэргээхэ. Тиихэдэ залуу мал хайшан гэжэ ажаллахаб, эхэ хонидые түрэлгэдэ бэлдэлгэ, эхэ хонидые ба хусануудые хооллуулха рацион, ветеринариин тарилганууд г.м. ойлгосонууд, онол аргануудтаяа дэлгэрэнгыгээр хубаалдаа һэн.

You have no rights to post comments