Буйлуулгада бэлдээтэй мяхан. 

 

Могойтын аймагай Ленинэй нэрэмжэтэ ажахы (Зугаалай) үүлтэртэ мал үсхэбэрилдэг юм. Мяха буйлуулдаг цех нээжэ, мяханай зүйлнүүдые наймаалжа, олзо оршо олодог болонхой. Тус ажахын хүтэлбэри хэдэн жэлэй саада тээ хүдөө ажахын кооператив (СПК) байгуулаа һэн. Хоёр жэлэй саана хизаарай хүдөө ажахын кооперативуудай хоорондо соносхогдоһон конкурсдо хабаадажа, грант шүүһэн байна. Ажахын түрүүлэгшэ Буда Бальжинимаевай хэлэһээр, нэн түрүүн ажахынгаа материально-техническэ бааза хүгжөөхэ гэжэ шиидээд, мяханай цех нээһэн юм. Грантын мүнгэн дээрэ ажахынгаа зөөри нэмэжэ, үйлэдбэриин объект нээхэ ажал ябуулаа. Удангүй түб һууринһаа хойшо хуушан һаалиин дэбисхэр дээрэ зургаан метр үндэртэй, юһэн метр утатай хоёр дабхартай хабсарһан түхеэрэлтэ - цех богони болзор соо бодхоогоо. Үнгэрэгшэ жэлэй хабар цехынь нээгдээ һэн. Цехэй байшан соо мяха хүргэдэг ба буйлуулдаг түхеэрэлтэнүүд ами аминдаа таhалганууд соо хабсараатай. Мал гаргадаг талмай, хюрөө, мяха хүргэдэг камера ба бусад хэрэгсэлнүүд бии. Һая нээгдээд, ажалаа эхилхэдээ, үдэрэй гурба-дүрбэн бодо мал гаргадаг байһан. Оршон үедэ үдэрэй арбан толгой хүрэтэр эбэртэ бодо мал үүсэлдэг шуу. Томо холодильнигтай. Тэрэнь арбан хоёр тонно мяха багтаадаг. Удангүй котлетэ, фарш, банша, бууза ба бусад эдеэ хоолой зүйлнүүдые наймаада табидаг болоо. Цехтээ мяха сонгоодог түхеэрэлтэнүүдые абажа, полуфабрикадуудые болбосоруулна. Нютагай ажаhуугшад цехэй наймааһаа дуратай хоолоо худалдан абадаг байна. Мяханай зүйлнүүдэй үнэ сэнгынь дэлгүүрэй сэнгhээ доошо ха. Эндэ хүдэлдэг зон ажалдаа оролдосотой, салингаа саг соогоо абадаг гэжэ хэлэгдэнэ. Зугаалайн мяханай эдеэ хоол Могойтын аймагай наймаануудаар табигдадаг. Хамта дээрээ арбан зургаан янзын хоол дурадхана. Худалдан абагшадай тэмдэглэһээр, мяханай зүйлнүүдтэ амта оруулһан ямаршье нэмэлтэ үгы, сэбэр эдеэ хоол болоно. Модульно цехэй ашаглагдаһан сагһаа хойшо мяха болбосоруулгын ажал нэгэшье үдэр тогтонгүй ябуулагдана. Аймагай хүдөө һуурингуудай сэсэрлигүүд энэ цехэй зүйлнүүдые абана бшуу. Эндэ һая Ага тосхондо үнгэргэгдэһэн Сагаалганай һайндэрэй хэмжээ ябуулгада Зугаалайн цехэй мяханай үйлэдбэринүүд үзэсхэлэндэ табигдажа, олоной анхарал татаа. Хизаарай амбан захирагша Александр Осипов Зугаалайн үйлэдбэритэй дүтөөр танилсажа, ажахын хүтэлбэридэ амжалта хүсөө. 

Дэлгэрэнгыгээр 9-дэхи дугаарта.

You have no rights to post comments