Зарим ажахынуудаар март һарада сакман эхилээ. Харин диилэнхи хуби ажахынуудта харюусалгата ажал апрелиин тэн багаар эхиеэ абаба. Могойтын аймагай 98 отарада 33329 эхэ хонинһоо түл абтана. Эдэ малһаа могойтынхид 29499 хурьга абахаар түсэблэнэ. Агын аймагта 20476 эхэ хонин түрэлгэдэ хабаадуулагдана. Аймагай ахамад зоотехник Батор Цырендоржиевай хэлэһээр, малшадта энэ жэлдэ 19153 хурьга абаха даабари үгтэнхэй. Хамта 60 буусада хонидой түрэлгын ажал ябажа байна. Мүнөөдэрэй байдалаар, 4700 гаран хурьган абтанхай. Хамтын ба фермерскэ ажахынуудаар зоотехник, ветеринарнууд ябажа, сакманай ажал харууһан дороо байлгана.
   Дулдаргын аймагта Зүдхэлиин малшад эрхимээр ажаллана. Хүршэ Тугшанайнь «Онон» ажахынхид 2014 эхэ хони түрүүлнэ. Үсөөн малтай «Шандали», «Балжана» ажахынуудта сакман дүүрэхэ тээшээ дүтэлжэ байнхай. Олон малтай ажахынуудые нэрлэхэдэ, Агын аймагта «Хүнхэр» – 5153, «Согто-Хангил» – 5140, Могойтын аймагта «Догой» – 5210, Ленинэй нэрэмжэтэ (Зугаалай) – 4516, «Хүһөөшэ» – 3549, Дулдаргын аймагта «Родина» ажахы 5613 хонитой. Тойрог дотор эгээл түрүүн «Догой», «Ушарбай», Кировэй нэрэмжэтэ, «Гэрэл» ажахынууд түл абалгынгаа ажал эхилээ һэн. Могойтын аймагай ажахынууд тойрог соогоо эгээл олон хонитой байна бшуу. Фермернүүдэй ажахынуудай хоорондо Могойтын аймагай «Гэрэл» ажахын малшад түл абалгаар түрүү зэргэдэ ябана. Тус ажахыда мартын тэнгээр хонидынь түрэжэ эхилһэн байгаа. Апрелиин 15-ай байдалаар, гэрэлэйхид 1700 гаран хурьга абаад байна. Ажахын эхэ хонид 2445 толгой болодог шуу.

   Малшанай буусада
   Хара-Шэбэр нютагай мэдээжэ хонишон Светлана Маркелова гуша гаран жэлдэ бүмбэр сагаан хонин һүрэг арьбажуулжа ябана.
   Тэрэнэй даашада арьбадхагдадаг мал жэлбэтэй түрэнэ. Бууса дээрээ нарин нооһото үүлтэрэй хонидые харана. Түрүү малшан мал ажаллаха дүршэлөөрөө хубаалдаха хүсэлэнтэй. Тэрэнэй заабаряар, хони бэлшүүлхэ хэрэгтэй. Мал бэлшээридэ ябахадаа, тэнхээ тамираа алдахагүй. Хурьга һайнаар абахын тула эхыень һайнаар ажаллаха хэрэгтэй бшуу. Түрэлгын урда тээ эхэ хонидой хоолдо анхарал хандуулхань шухала. Уһалха, дабһа, зелёнко үгэхэ. Һүтэй хонинһоо сэбэр хурьган гарадаг. Дулаан хашаар соо түрүүлхые оролдохо, хүйтэн газарта түрэбэл, хурьган хадхаляатажа магад. Түрэһэн хониндо уурагыень эдюулхэдэ һайн. Малшан нэгэ һүни соо хори, гушан хони түрүүлдэг байһан. Хонишоной бүлэ эгээл олон 600 гаран хони түрүүлдэг байһан гээшэ. Хорёод, гушаад хурьган нэгэ доро мүндэлшэхэ. Уларилай дулаан байгаа һаа, хонидые адуулха хэрэгтэй. Хаамаг соо хаалтатай байһан мал һүгүй, шадал муутай байха даа. Зундаа һүүдэр газарта хонидые хургуулха ушартай. Мүнөө хабар 120 эхэ хони түрүүлнэ бшуу.

Дэлгэрэнгыгээр 15-дахи дугаарта.

Эрдэни ЧИМИТДОРЖИЕВ.

You have no rights to post comments