Энэ асуудал Агын Буряадай тойрогой Түлөөлэгшэдэй Суглаан дээрэ үргэнөөр харагдажа, үүлтэртэ малай ба ажахынуудай байдал тухай мэдээсэгдэжэ, тусхай шиидхэбэринүүд абтаа юм.
Тодорхойлбол, Агын Буряадай тойрогой Түлөөлэгшэдэй Суглаанай 2016 оной сентябриин 22-ой 245-дахи дугаарай иимэ шиидхэбэри байна: Забайкалиин хизаарай Хүдөө ажахын ба эдеэ хоолой министерствэдэ «Yүлтэртэ эхэ малай тоо толгой условно толгой болгохо коэффициентнүүд» гэһэн РФ-гэй Хүдөө ажахын министерствын захиралтада хубилалта бэлдэжэ, забайкалиин үүлтэрэй моридто, агын үүлтэрэй хонидто коэффициентыень дээшэнь болгохо; үүлтэртэ ажахынуудта табигдадаг эрилтэнүүдые дүүргэлгэ шангалан шалгажа байха, «Агын үүлтэртэ үйлэдбэри» гэһэн муниципальна байгуулалтануудай хоорондын үүлтэртэ үйлэдбэриие «хонидые хэмэл аргаар үрэжүүлдэг эмхи» гэһэн зэргэтэй болгожо, гүрэнэй үүлтэртэ регистртэ оруулха; агын үүлтэртэ эхэ хонидые ба хусануудые худалдажа абаха арга олохо; Агын тойрогой үүлтэртэ ажахынуудай хүтэлбэрилэгшэдтэ «Росагролизинг» АО-той үүлтэртэ мал худалдажа абаха тухай сэхэ хэлсээ баталха; үүлтэртэ мал һэргээлгэдэ гүрэнэй үгэһэн мүнгэн тэдхэмжэ зүб мүрөөр эдлэхэ, зоотехнигүүдэй, малай аргашадай эрдэм ба дүршэл дээшэлүүлгын һуралсал эмхидхэхэ, Агын үүлтэртэ үйлэдбэриин директортэ селекциин ба үүлтэртэ ажалай 5 жэлэй түсэб зохёохо гэхэ мэтэ туһатай зүбшэлнүүд үгтөө бшуу. Тус шиидхэбэри соо дэлгэрэнгы иимэ мэдээсэл бии: «Манай тойрогто үүлтэртэ мал үдхэхэ үүргэтэй 6 үүлтэртэ завод, 10 үүлтэртэ репродуктор, «Агын тойрогой ветеринарна лаборатори» байгуулга ба муниципальна байгуулалтануудай хоорондын «Агын үүлтэртэ үйлэдбэри» гэһэн эмхинүүд бии юм.
Д.Гунгаев хангилай нарин нооһото үүлтэрэй хонидоо адуулна. Авторай фото-зураг.
Эндэ үүлтэртэ ажал 23 шэглэлээр ябуулагдажа, тус ажахынууд 23 федеральна үнэмшэлгэтэй болоhон. Тэдэнэр залуу малайнгаа 10 хубииень заабол худалдажа, һайн үүлтэр дэлгэрүүлхэ эрилтэтэй юм. Манай тойрогто дүн хамта 66632 толгой үүлтэртэ хонин, тэрэ тоодо 49106 толгой эхэ хонин тоологдоно. Энэнь тойрогой бүхы хониной 36,4 хубинь болоно. Һүүлшын 5 жэлэй туршада үүлтэртэ хонидой тоо толгой 80500-hаа 66600 толгой хүрэтэр унажа, 17,2 хубяар үсөөрөө. Мүн Кировэй нэрэмжэтэ СПК-да ба «Ушарбай» үүлтэртэ заводто хонид 2 дахин үсөөн болоо.
Yмсын хамhабариин ажахынуудта, КФХ-нуудта хонидой тоо жэл бүри олошордог. 2016 оной январиин 1-эй байдалаар, тойрогой хүдөө ажахын үйлэдбэринүүдтэ - 102900 толгой, фермерскэ ажахынуудта - 24400 толгой, ЛПХ-да - 55600 толгой хонин hүрэг байгаа. 2016 ондо Агын тойрогто дүн хамта 63796 хурьган абтажа, 100 эхэ хонин бүриhөө 93,5 хурьган түлжүүлэгдээ, 2865 толгой тугал, 1057 унаган мүндэлөө. Гүрэнэй ба Забайкалиин хизаарай правительствын зүгһөө дэмжэлтэ үзүүлэгдээшье һаань, үүлтэртэ мал дутуу хүгжэнэ. Шалтагааниинь - зоотехник-селекционернүүд, үүлтэртэ хэрэгэй тоо бүридхэгшэд, үрэжүүлэгшэ-технигүүд дуталдана, үүлтэртэ залуу мал бэлээр худалдан абаха газарнууд үгы байна».
Дэлгэрэнгыгээр 41-дэхи дугаарта.
