Хара-Шэбэрэй хара хүрьһэтэй таряалан дээрэһээ талхан, хилээмэн болохо хоолой зүйлнүүд амбаараар дүүрэн хуряагдадаг юм.

 

Р. Лхамажапов, С.Ермоев амарха сүлѳѳгүй поли дээрэ үдын хоол барина.

 

Эдэ үдэрнүүдтэ таряашадынь намарай һалхинда долгитожо байһан шара хоолосуудаа унагаажа, орооһо таряагаа суглуулжа дүүргэбэ. Таряа ургуулгаар холо ойгуур суурхажа ябаһан Кировэй нэрэмжэтэ ажахын 1-дэхи ба 2-дохи ажахынуудые мүнөө үедэ олзын хэрэг эрхилэгшэд ударидажа, ажал ябуулна.

ГАНДУУ БАЙБАШЬЕ, ТАРЯАН ХУРЯАГДАБА

Yмсын хэрэг эрхилэгшэ Екатерина Галсанова Жэбхээһэндэ анхан 1-дэхи бригадын байһан ажахы дээрэ орооһото культурануудые ургуулна. Екатерина Жигжитовна экономист мэргэжэлтэй, Кировэй нэрэмжэтэ ажахыда бухгалтераар хүдэлһэн. Һүүлэй жэлнүүдтэ нүхэртэеэ хүдөө буусада мал үсхэбэрилжэ байһанаа, 2013 ондо үмсын хэрэг эрхилэгшэ болоһон байна. Тиигэжэ гурбан жэлэй туршада үмсын хамһабариин, тэрэ тоодо таряан ажалые амжалтатай ударидажа ябана. Өөрынь хэлэһээр, эхэнэр хүнэй зониие хүтэлжэ, ажалда ябуулхань бэлэн бэшэшье һаань, бригадынгаа ажалшадаар үгэ нэгэтэй, эбтэй ажаллахадань, хүдэлмэринь бүтэсэтэй байна. Тэрэнэй ударидадаг ажахы түрүүшын жэл 300 га шэниисэ, 200 га обёос тариһаниинь, һайнаар ургаа бэлэй. Баян ургаса хуряахадаа, өөрөөшье, таряашадыньшье урмашаа бшуу. Екатерина Жигжитовна таряа тарихынгаа урда полиёо бултыень хорёолхо гэжэ шиидээ. Түрэл зоноо, нүхэдөө хэлэжэ, таряаланаа хорёолоо. Столбын модо, проволоко абалгада ехэ гарша гараа. Хоёр мянган столбын модо абажа, газар руу зоогоо. Хүнэй хэһэн ажал хайрлахаяа мэдэхэгүй туруута мал зарим газараар модонуудыень унагаажа, һаад үзүүлдэг. Түрэл Кировэй нэрэмжэтэ ажахытаяа аренднэ гуримаар хүдэлдэг. Хэлсээнэй ёһоор, ургасынгаа 10 хубииень ажахыдаа үгэхэ ёһотой. Галсановагай ажахы хабартаа ба намартаа ажахынгаа трактор техникэ ашаглажа, ажалаа бүтээдэг юм. Тракторнуудынь барандаа хуушаранхай. Поли дээрэ удаан ябангүй эбдэрхэ. «Нэгыень заһаад ябуулхадаш, нүгөөдэнь һаатаха. Ажал урагшань ябуулхагүйнь хабатай», - гэжэ Екатерина Жигжитовна һанаагаа алдан хөөрэнэ.

 

 

Дэлгэрэнгыгээр 42-дэхи дугаарта.

You have no rights to post comments