Нэн түрүүн «Табтаанай» хүдөө hууринай захиргаанай толгойлогшо Туяна Лубсановатай уулзаабди. Тэрэнэй мэдүүлһээр, Табтаанайда 1021 хүн ажаһууна, тэдэнэй тоодо 381 бүһэтэн, 418 эхэнэрнүүд, 222 үхибүүд. Наһанай амаралтада гараһан 150 хүн, 55 ажалай ветеранууд, ара талын 5 ажалшад, 18 дайнай үеын хүүгэд, 75 эрэмдэг хүн тоологдоно. Һууринда 176 үрхэтэ айл байдаг, дүрбэн үйлсэтэй, хүүгэдэй наададаг талмайнууд, дүрбэн ТОС бии. Зон hургуулида, хүүгэдэй сэсэрлигтэ, тамирай байшанда, ФАП-та, почтодо, агрокооперативта, худагуудта, «Саханай» гэһэн дулаасуулгын эмхидэ ажаллана. Таряашадай дүрбэн ажахы, 26 хүдөө газар, үмсын ажахынууд бии.
   Туяна Эрдынеевна иигэжэ хөөрэнэ: «Жамсо Тумуновай нэрэмжэтэ үйлсын харгы 2021 ондо асфальтаар хушагдаһан, гэрэлтүүлгэ хэгдэһэн. Калининай үйлсэ «Табтаанай-Дулдарга» гэһэн хизаарай харгыда хабаатай. Ерэхэ жэл энэ харгын заһабарилгада ороходонь, үйлсэ һайжаруулагдаха, гэрэлтүүлгэ хэгдэхэ юм. Дүрбэн ТОС олон түлэблэлнүүдтэ, грантнуудта хабаададаг. 2024 ондо «Берёзка» ТОС «Решаем сами» гэhэн мүрысөөндэ 450 мянган түхэригэй грантда хүртэжэ, хэhээлтэдэ ороһон нютагайхидай дурасхаалай хүшөө бариһан. Хүшөө үшөө һайжаруулжа, хорёолжо, Дурасхаалай аллей болгохобди. Һургуулиин хорёо соо байдаг Дурасхаалай хүшөө 14-дэхи выпускынхид 10-дахи ангиин байхадаа бариһан, тэрэниие өөдэнь татажа байдагбди.
   Энэ жэлэй эхинһээ зон, hургуулиин выпускнууд мүнгэ суглуулжа, «Оюун бэлигээ – Ага нютагтаа» һургуулиин хүүгэдэй уран һайханай харалгада, ветерануудай «Не стареют душой ветераны» мүрысөөндэ хабаадахадань туһалаа.
   Баруун тээ сэрэгэй тусхай үйлэ хэрэгтэ Табтаанайн олон хүбүүд хабаадана, хүбүүдэйнгээ хойноһоо һү, сайгаа үргөөд, маани мэгзэм уншанабди, гэртээ амиды, бүрин бүтэн бусаха болтогой гэжэ зальбарнабди. Хүбүүдтээ хабар 6 мянга гаран бууза, мяха, мяханай зүйлнүүдые, бообо, үрмэ эльгээгээ һэмди, хүгшэд оймһонуудые нэхэжэ оёо һэн. Телеграмда «Добрые сердца Таптаная» гэһэн нютайхидай һайн дуратанай хүдэлөөнэй бүлэг бии. Энэ хүдэлөөнэйхид Ростов-на-Дону хотын сэрэгэй госпитальдо медсестрагаар ажаллажа байhан нютагайнгаа басаганда эмнэлгын хубсаһануудые оёжо эльгээгээ.
   Майн 9-дэ Дулдаргада болоһон Илалтын 80 жэлэй ойн баярай һайндэртэ «Марши Победы» гэһэн дуунай ба жагсаалай аймагай мүрысөөндэ эхэнэрнүүдэй можо 2-дохи hуури эзэлээ.

You have no rights to post comments