Түрэл буряад хэлэеэ бүрин бүтэн үлѳѳхые оролдодог, “Забайкалиин хизаарай элүүрые хамгаалгын габьяата хүдэлмэрилэгшэ” гэhэн нэрэ зэргэтэй, Могойтын аймагай түб больницын ИФА лабораториие даагша Галина Цыбенова үнэн сэхэ, даруу зантай, олоной түлөө ябадаг хүн юм.
ДҮРШЭЛТЭЙ ЭМШЭН
Галина Георгиевна Шэтын гүрэнэй эмнэлгын дээдэ һургуули түгэсхэжэ, доторой үбшэнгүүдые эмшэлдэг терапевт мэргэжэлтэй боложо гараһан. Наһанайнь нүхэр - Валерий Цыбенов дээдэ эрдэмтэй аргашан юм. Залуу мэргэжэлтэд Могойтын аймагай түб больница 1991 ондо ерэжэ, ажалда ороһон намтартай. Валерий Доржиевич нүхэрынь хирург, онкологоор хүдэлөө, мүнөө отоларинголог ба эндоскопист юм. Галина Цыбенова Могойтын эмнэлгын газарта ИФА (иммунно-ферментный анализ) лабораториие даагшаар ажаллахын хажуугаар КД (клинико-диагностический анализ) лабораториие даагшын амаралтада байхадань, хоёр лабораториин ажал харюусалга дороо абаад ябана. Эндэ ВИЧ, гепатит, туберкулёз, сифилис гэхэ мэтэ хамаг халдабарита үбшэнгүүдые шалгадаг.
Д.Цыренова (зүүн гарһаа), С.Батоева, Г.Цыбенова, Б.Нимаева.
Галина Георгиевна подростково терапевтээр хүдэлөөд, 2002 онһоо КДЛ лабораториие даагшаар ажаллаа.“Могойтын больницада ИФА лабораториин, халдабарита үбшэнгүүдэй таһагай томо байшан 2006 оной ноябрь һарада нээгдэһэн. Хүйтэнэй сагта сэбэрлэлгын ехэ ажал бүтээжэ, байраяа түхеэржэ, 2007 оной январь һараһаа эндэ хүдэлжэ эхилээ һэмди. Урда жэлнүүдтэнь шэнжэлэлгэдэ хэрэгтэй хамаг шуһа Ага абаашадаг байһан. Иимэ ехэ лабораторитой болоходоо, бидэ элдэб үбшэн, тэрэ тоодо шуһаар дамжуулагдадаг СПИД - халдабарита үбшэнэй шэнжэлгэ (анализ) хэнэбди. Мүнөө хүгшэн залуугүй энэ үбшэндэ нэрбэгдэдэг. Бэлгэ хурисалаар гү, али үбшэн эхэһээ дамжуулагдадаг ВИЧ үбшэ аргалдаг болоо. Тиихэдээ эм домдонь ехэ мүнгэн гаргашалагдадаг. Манай лабораторидо 3 лаборантнууд, дээдэ эрдэмтэй эмшэн гээд 5 хүн хүдэлдэгбди. Би өөрөө столой саана миин һууха бэшэ, шэнжэлэл хэлсэдэгби. Байд гээд лэ шалгалта, һуралсал гаража, лицензи абадагбди,” - гэжэ ажал тухайгаа лабораториие даагша Г.Цыбенова хөөрөө һэн. Минии лабораторидо ороходо, фельдшер-лаборант Долгоржаб Цыренова, эмнэлгын технолог Сэсэгма Батоева, санитарка Баярма Нимаева гэгшэд ажаллажа байгаа.
Галина Георгиевна ажалтадтаяа суг хамта лабораториин шэнэ байшанай газаа жэмэстэ һөөг мододые тариһан, дулаанай үедэ үлир, долоогоно сэсэглэдэг. “Набша намааень хатаагаад, сай шанадаг, долоогоно зүрхэнэй үбшэнэй эмэй хубида ородог, жэмэсыень бусалгаад, шуhанай дараса буулгадаг,” - гэжэ дүршэлтэй эмшэн тэмдэглээ һэн.
Дэлгэрэнгыгээр 49-дэхи дугаарта.
