Забайкалиин «Боевое братство» региональна таhагай ветерануудай үүсхэлээр, 2016 оной майн 25-да хизаарай Хуули байгуулгын Суглаанай депутадууд «Сентябриин 24 – Сэрэгэй алба хаажа ябаhаар, ами наhаяа алдаhан үбэр байгалайхидай (забайкальцы) дурасхаалта үдэр» гэhэн тогтоол баталhан байна.
Ушар юуб гэхэдэ, 1984 оной сентябриин 24-дэ Шэтэ хотын 20 наһатай Сергей Токмаков Афганистанай дайнда дайшалхы нүхэдөө шэн зоригтойгоор абарһаар, хариин газарта алдалан унажа, түрэл нютагаа бусаагүй. Тиихэдэ тэгшэ 26 жэлэй үнгэрhэн хойно эгээл энэ үдэр Ага нютагаймнай эрэлхэг хүбүүн, матрос Алдар Цыденжапов «Быстрый» эсминец дээрэ түймэрэй гарахада, баатаршалга гаргажа, 300 сэрэгшэ нүхэдэйнгөө ами наhа аршалаа, «Россиин Баатар» болоо. Мүнөө жэл сентябриин 24-дэ Ага тосхондо «Забайкалиин интернационалист сэрэгшэдэй дурасхаалта үдэр» гэhэн ёhолол Баатарнуудай аллейн дэргэдэ түрүүшынхеэ эмхидхэгдэhэн байна. Эндэ олон хүн сугларжа, Советскэ Союзай, Социалис ажалай, Россиин Баатарнуудай хүшөөнүүдтэ гүрлөө сэсэгүүд табигдаа, нэгэ газарта болоһон байлдаануудта (локальные войны) хабаадаhан сэрэгшэд жагсаалда гаража, «Боевое братство» эмхиин туг намилзуулан ябаа hэн.
Агын тойрогой 500-гаад хүбүүд сэрэгэй уялгата албаяа дүүргэхэдээ, элдэб зэбсэгтэ зүрилдөөн байлдаануудта хабаадаhан. Тэдэнэй нэгэн - сагаангууд угай Александр Дансаранов Чечен дайнда ябаhан үе сагаа иигэжэ дурсаа бэлэй: «1999 оной август hарада полевой командирнууд - Шамиль Басаевай ба Эмиль Хаттабай бүлэгүүд Чечен республикын Ичкериин газар дайдаhаа Дагестанай дэбисхэр руу нэбтэрэн ороhон. Бидэнэй ошоходо, боевигүүд Дагестанhаа түригдэжэ байгаа.
Дэлгэрэнгыгээр 51-дэхи дугаарта.
