Ноябриин 1-дэ «Толон» һониной «нара» хараһаар 27 жэл болобо. Энэ ушараар дашарамдуулан, мүн захилай хаһын хэмжээндэ хүдѳѳ нютагуудта, эмхинүүдтэ «Толон» газетэдэ захил эмхидхэгшэд тухайгаа хѳѳрѳѳгѳѳ үргэлжэлүүлхэмнай.

Дулдаргын аймагай Тугшан нютагта 2011 онһоо социальна хүдэлмэрилэгшѳѳр ажалладаг Сентябрина Мункуевна Бороева тэрэл жэлһээ газетыемнай уншагшадта хүргэдэг юм. Сентябрина Мункуевна - Хойто-Ага нютагай басаган, наһанайнь нүхэр, һургуулида хэдэн жэл ажалай, сэрэгтэ бэлэдхэлэй хэшээлнүүдые зааһан багша, мүнѳѳ муниципальна эмхиин хүдэлмэрилэгшэ Батор Бадмажапович Бальчинов мүн лэ Хойто-Агын хүбүүн. Эрхэхэн бэрхэхэн гурбан басагадые хүмүүжүүлжэ байһан энэ гэр бүлын ажалша бүхэриг зотой Тугшан нютаг зѳѳжэ ерээд, байра байдалаа түхеэрһээрнь, долоон жэл үнгэршэбэ. Мүнѳѳ Тугшан дээрээ ѳѳһэдын зон болонхой, ажалтайнууд, үмсынгѳѳ хамһабариин ажахы барижа, үнгэрэгшэ зун шэнэ гэр бодхоогоод, амгалан тэнюун ажаһууна.

Нютагай зон Сентябрина Мункуевна тухай аалин түбшэн хүн, ажалдаа оролдосотой, бэрхэ гээд хэлэхэ байна. Хүдөөгэй юрын лэ эхэнэрнүүдтэ адли боро шэрхи, хара ажалһаа тухашархагүй. Социальна хүдэлмэрилэгшөөр хүдэлхын урда тээ хүүгэдэй сэсэрлигтэ хүмүүжүүлэгшээр хүдэлһэн намтартай. Тэрэ гэһэнһээ хойшо хэды олон жэлэй үнгэрһэншье һаа, Сентябрина Мункуевна хүүгэдтэеэ жэгтэйхэнээр үгэеэ ойлголсодог һэн, хүүгэд һайнаар үгыень дууладаг байгаа гээд мүнөөшье болотор хөөрэлдэдэг.

Дэлгэрэнгыгээр 44-дэхи дугаарта.

You have no rights to post comments