Манай аба - Дагба Ринчинович 1934 ондо хабтагай Агынгаа хоймор талада оршодог Шулуутай нютагта байтай хүбдүүд омогой Гармажабай Батомунхын ба Батын Цымпелмагай гэр бүлэдэ түрэһэн юм. Арбан гурба наһатайдань дүтын түрэл болохо Дарибазарай Ринчинэйхи үри болгон абаһан байна.
   Абамнай балшар наһаяа дурсан һанахадаа: «Бага наһандаа Шандан Хүнды гэжэ һүнэй фермэдэ эжы абынгаа ажалладаг тугал буруу туужа, булагай хүйтэн уһа зѳѳжэ, үетэн үхибүүдтэеэ урилдан, добоһоо модон боошхын хабһан дээрэ һолжорһоор, Шулуутайн голдо тамаржа, шунгажа наадаһаар лэ үндыһэн хүм. Нэгэдэхи классай һурагша ябахадам, һургуулидамнай айхабтар гоё, яла сала ёлко болоһон юм. Тэрэ ёлко дээрэ һургуулиимнай директор Цыбендоржи Батомункин Жабар Үбгэн болоходоо, намайе дээрэ үргэжэ, хасарыем үндѳѳд, «минии эгээл эрхим шаби» гэжэ эрхэлүүлэн, шагнал барюулаа агша һэн. Тэрээн шэнги һайхан ёлко бэшэ һанагшагүйб. Нэгэдэхи класс дүүргээд, пионерлагерьта амархаяа ошобобди. Хүүгэд бидэнэй хүхюутэй, зугаатайгаар амаржа байтар, нэгэ үдэр бидэниие жагсаагаад, Эсэгын дайн эхилээ гэһэн һүрѳѳтэй мэдээсэл дуулгаа һэн. Тиигээд удангүй бидэниие тараажа, лагерь хааһан юм».
   Дайнай хатуу жэлнүүдтэ бусад үетэнтэеэл адли юһэтэйһѳѳ томо зонтой зэргэсэн, зундаа үбһэ сабшалгада, намартаа таряа хуряалгада болон фермын барагдахагүй ехэ ажалда үглѳѳнэй улаан наранаар бодожо, үдэшын харанхы болотор ябажа, эдир наһанһаа тэрэ үеын хүндэ хүшэр ажалай амта бэе дээрээ дүүрэн амсаһан байна. Дүрбэн класс дүүргээд, һуралсалаа Агын нэгэдэхи дунда һургуулида үргэлжэлүүлээ.

You have no rights to post comments