Ноябриин 21-дэ бухгалтернууд мэргэжэлтэ һайндэрөө тэмдэглэдэг юм. Энэ һайндэрые угтуулан, Агын аймагай Гүнэй нютагай, бухгалтер мэргэжэлтэй Цырегма Пурбуеватай уулзаһан байнабди.

Агын аймагай баруун урда захада, Ага тосхонһоо 90 модо зайда оршодог Гүнэй нютагта Пурбын Раднацыренэй гэр бүлэдэ 1968 ондо Цырегма басаган түрөө юм. Тэрэ мүнөө нютагайнгаа захиргаанай ахамад бухгалтераар хүдэлнэ, хажуугаарнь бүгэдэ буряадай «Толон» һониной захил олон жэлэй туршада эмхидхэнэ.

Цырегма Раднацыреновна 11 хүүгэдэй наймадахинь болоно. Тэрэ 1985 ондо дунда һургуулияа түгэсхөөд, аяар холын Красноярск хото эгэшэдээ ошоһон байна. Тэндэ технологическа техникумдэ «трикотажна хубсаһанай технолог» гэһэн мэргэжэлдэ һураһан. Һураха үедөө Трикотажна хубсаһанай гэртэ модельнүүдтэ хубсаһа оёдог байгаа. Тэндэ долоон жэлэй туршада хүдэлөө. 1993 он болотор Красноярск хотодо байгаад, түрэл нютагаа бусаһан. Тэрэ үедэ хони харадаг байһан аба эжыдээ туһа боложо, хониндо ябалсаа. Хажуугаарнь бухгалтерай гурбан һарын курс дүүргэһэн байна. 1998 ондо абынгаа нүгшэхэдэ, сээнтэр зөөжэ ерээ бшуу.

2000 онһоо зургаан жэлэй туршада нютагайнгаа почтодо хүдэлөө. Энэ сагһаа нютагайхидтаа «Толон» һонин дэлгэрүүлжэ эхилһэн юм. Һүүлээрнь 2006 онһоо нютагайнгаа захиргаанда бухгалтер-кассираар ажаллаа. Үнгэрэгшэ жэлэй май һарада ахамад бухгалтераар томилогдоо бшуу.

Цырегма Пурбуева хоёр үхибүүдтэй: ехэнь – Номин, багань – Зоригто. Номин мүнөө Шэтэ хотодо оршодог Забайкалиин дээдэ һургуулиин магистратурада психологой мэргэжэлдэ һуража байна. Зоригто - 7-дохи ангиин һурагша. Хоюулаа номдоо бэрхэ, буряад хэлэндэ дуратай, элдэб янзын олимпиадануудта, конкурснуудта хабаададаг. Жэшээлбэл, Зоригто хүбүүн «Буряад хэлэмнай һэргэг», «Аба эжын хэлэн гамтайл» г.м. буряад хэлэнэй мүрысөөнүүдтэ шангай һууринуудые эзэлжэ, Гүнэй нютагаа суурхуулһан. Түрэл хэлэн дээрээ олон оньһон үгэнүүдые, таабаринуудые мэдэдэг. Тэрэ түрэлхидэйнгөө, нютагайнгаа омогорхол юм.

Цырегма Раднацыреновна хайрата гансахан эжыгээ хажуудаа абаад байдаг. «Эжымнай - Доржын Лхама 11 үхибүүдые түрэһэн, «Эхэ-Герой» нэрэ зэргэдэ хүртэһэн. Һургуулиин складые даагшаар хүдэлһэн юм.

Гүнэйн ажаһуугшадай 40 гаран хубинь ондоо яһатан: ород, башкир, татар г.м. Тэдэ буряадаар дуугардаггүй. Һүүлшын жэлнүүдтэ ород зон олошорһон байна. Тиимэһээ «Толон» захиха хүн үсөөн болоо бшуу. Тиигэбэшье нютагай захиргаан руу 51 экземпляр ошодог. Дунда һургуулиин 11 анги нэгэ-нэгые захидаг болонхой. Гуша гаран жэлэй туршада һургуулида буряад хэлэ заажа ябаһан багша Баирма Бальжинимаевна Дылгырова жэл бүри буряад хэлэнэй конкурснуудта һайн дүнгүүдые харуулдаг юм. 

Дэлгэрэнгыгээр 46-дахи дугаарта.

You have no rights to post comments