Тэрэ тоодо манай редакцииншье түсэбүүд сагай эрхээр хубилгагдана. Һара урид түсэблэгдэһэн хэмжээ ябуулгануудай болигогдоходо, манай түсэбтэшье һэлгэлтэнүүд оруулагдана. Репортажнууд, тоосоонууд, тэмдэглэлнүүд газетын нюурнуудта гарахагүй, тэрэнэй хажуугаар сэтгүүлшэдэй хүн зонтой уулзаханьшье орёошог болоно бшуу.
Теэд хэмжээ ябуулгануудай хэды болигогдоошье һаа, «ямар темээр юу бэшэхэмнай гээшэб?» гэһэн асуу-дал манай сэтгүүлшэдые дан ехээр мэгдэхээхэгүй гэжэ һанагдана. Юундэб гэхэдэ, коронавирус тухай бага сагын мэдээсэлнүүдые үгэжэл байхабди, зүгөөр «Толон» һониной гол сэдэбүүд хадаа ёһо заншал, үндэһэн соёл, урлал, түүхэ, хизаар ороноо шэнжэлэлгэ, уран зохёол г.м. болодог юм. Түрэлхи буряад хэлэеэ hэргээхэ, хүгжөөхэ, олониитэдэ дамжуулха, hонирхуулха ажал сэтгүүлшэднай ябуулна. Арадайнгаа түрүү хүнүүд тухай, буряадайнгаа уг гарбал, хаахаанагүй ажамидардаг, амжалтатай ажаллажа байhан зон тухай, хилын саана ажаhуудаг угсаатан тухайгаа, түрэл саданарай холбоо, монгол туургата зонтоёо холбоо харилсаагаа үргэн дэлисэтэй болгохо, буряад хэлэн, уран зохёолнууд тухай ехээр бэшэхэ хэрэгтэй гэжэ хэлэхээр байна.
Оршон сагта олондо мэдээсэл тараадаг хэрэгсэлнүүд ямаршье хилэ, хизаарлал гаталха аргатай бшуу. Тиимэһээ «Толон» гансахан Агын тойрогтоо бэшэ, харин бүхы Үбэр Байгалай хизаарай дэбисхэр дээрэ, Буряад Уласта, Эрхүүгэй можодо, Ордын Адагай тойрогой аймагуудаар тараагдажа, уншагшадтаа хүрэдэг. Улаан-Үдэдэ ажаhуужа байhан Агын Буряадай тойрогhоо гарбалтай зондо илангаяа hонирхолтой, Ага нютагайнгаа hонинуудтай танилсахада ехэл зохид байдаг гэжэ уншагшаднай һанамжатаяа хубаалдадаг.
Мүнөө үеын түргэн сагай эрилтэнүүдтэ тааруулжа, «Толон» һонин бүхы дэлхэйгээр хурдан шууд тарадаг gazeta-tolon.ru сайт табан жэлэй саада тээ байгуулжа, холо ойро ажаhуудаг зониие мэдээсэлнүүдтэеэ танилсуулха арга боломжо бии болгоо бэлэй. Энэ сайт тухай хэды үгэ хэлэхэ болоо hаа, олон hонирхолтой сэдэбүүдтэй гэжэ тэмдэглэе: «Ниигэм», «Хүдөө ажахы», «Ёhо заншал», «Түүхэ», «Һуралсал», «Уран зохёол» г.м.
Энэ ажалаа саашань үргэлжэлүүлжэ, залуу үетэниие буряад хэлэндээ дүтэлүүлхэ, эхэ хэлэн дээрээ уншаха, бэшэхэ эрмэлзэлтэй болгохо зорилготойгоор Вконтакте, Facebook, Instagram гэһэн интернедэй һужаанууд соо нюурнуудтай болонхойбди.
Яагаад эдэ нюурнуудта орохоб? Хаягуудынь иимэ:
Вконтакте -
https://vk.com/tolon07
https://vk.com/tolon07
Facebook -
https://www.facebook.com/Всебурятская-газета-Толон-101686211482425/
https://www.facebook.com/Всебурятская-газета-Толон-101686211482425/
Instagram -
https://www.instagram.com/vse-buriatskaia-gazetatolon/
https://www.instagram.com/vse-buriatskaia-gazetatolon/
