Декабриин 10-да Могойтын аймагай Ага-Хангил нютагта Эсэгын дайнда эрэлхэгээр хабаадажа унаһан алдарта Нимбу Ламажаповай дурасхаалда волейболоор 36-дахи турнир үнгэрөө.
Тус турнир һүүлшынхеэ 2003 ондо эмхидхэгдэһэн байна. Мүнөө жэл түрэлхидэйнь, нютагайхидайнь, Могойтын аймагай захиргаанай үүсхэлээр энэ турнир һэргээгдээ бшуу. Хамта аймагай 12 команда нютагай тамирай хоёр танхим соо тэмсээ. Тиин хахад финалда дүрбэн команда гараа - Ага-Хангилай, Ушарбайн, Сагаан-Шулуутайн ба Могойто тосхоной. Команданууд һайн һорилготой байгаа гэжэ тэмдэглэхээр. Турнирай дүнгүүдээр, ага-хангилайхид – гурбадахи һуури, Ушарбай нютагайхид - хоёрдохи, Могойто тосхоной команда түрүү һуури эзэлээ юм. Ага-Хангилай эмхи зургаанууд, Н.Ламажаповай түрэлхид илагша командануудые, эрхим тамиршадые бэлэгүүдээр, мүнгэн шангуудаар, дипломуудаар урмашуулһан байна. Илаһан Могойто тосхоной командада түрэлхид тусхай шан – хони бэлэглээ юм.
Дэлгэрэнгыгээр 50-дахи дугаарта.
