Ага нютагай алдарта хүбүүн, Социалис ажалай Баатар, Шэтын можын ба Агын Буряадай автономито тойрогой хүндэтэ эрхэтэн Бальжинима Мажиевай түрэһөөр 100 жэлдэнь зорюулагдаhан үргэн хэмжээ ябуулга Гомбожаб Цыбиковэй нэрэмжэтэ Агын үндэһэтэнэй музейдэ январиин 17-до удхатайгаар үнгэргэгдөө бшуу.

 

Нэн түрүүн, Агын тойрогой, аймагуудай засаг зургаанай хүтэлбэрилэгшэд, түрэл гаралынь, нютагайхидынь Баатарнуудай Аллейдэ Б.Мажиевай ба бэшэшье Геройнуудай хүшөөнүүдтэ баглаа сэсэгүүдые табижа, һаруул дурасхаалыень ёһолон хүндэлөө.

Бальжинима Мажиев Кировэй нэрэмжэтэ колхозые 40 жэлэй туршада хүтэлбэрилжэ, хамтын ажахые аргагүй ехээр һалбаруулаа, СССР гүрэн дотор суурхуулһан байна. Мүн Эсэгын дайнда эрэлхэгээр хабаадаһан. Олоной түлөө оролдоһон түрүүлэгшэ амидыдаа үльгэр домогтол үндэр жэшээ болоһон хүн юм. Нютагайхидайнгаа этигэл, найдабарида хүртэжэ, СССР-эй Дээдын Зүблэлэй депутадаар 16 жэлэй туршада ябажа, Агын тойрогой арад түмэндэ даамайханаар туһаламжа үзүүлһэн. «Бальжинима Мажиевич хүдөө ажахы хүгжөөхын хажуугаар гүрэнэй ажаябуулагша байгаа. Аха захатанаа hанажа ябая!» - гэжэ Агын Буряадай тойрогой Түлөөлэгшэдэй суглаанай түрүүлэгшын орлогшо Даши Дугаров захяа һэн. Энэ уулзалгада хабаадаһан олон хүн алдарта түрүүлэгшые дулаанаар дурсаа, Хара-Шэбэрэй дунда һургуулиин үхибүүд шүлэгүүдые уншаа, Бальжинима Мажиевичай үри хүүгэд сугларагшадта баярые хүргөө. Удаань түүхээр баян, ажалша арадтай Хара-Шэбэр нютагай музейн үзэсхэлэн үргэнөөр дэлгээгдээ.

 

Дэлгэрэнгыгээр 3ахи дугаарта.

You have no rights to post comments