Эндэл “Мастера Аги” гэһэн арадай уран hайханай олзобориин ба байдалда хэрэгтэй шэмэг бүтээлэй үзэсхэлэн февралиин 21-дэ дэлгээгдэhэн байна.

 

Үзэсхэлэн харалгын үедэ.

 

Үзэсхэлэндэ бүгэдэ буряадай “Алтаргана” фестивалиин уран бэлигтэнэй мүрысөөндэ лауреадай ба дипломантын нэрэ зэргэнүүдтэ хүртэhэн, Агын тойрогой эрхим урашуулай гар бүтээлнүүд, зурагууд, хубсаhан табигдаа. Нэн түрүүн Забайкалиин хизаарай буряад соёл хүгжөөлгын түбэй директор Сэсэг Норполова уран бүтээлэй үзэсхэлэнэй нээлгэ хэжэ, Агын Буряадай тойрогой Захиргаанай соёлой ба тамирай хүтэлбэриин дарга Булат Бальжинимаев ба «Ага тосхон» хотын тойрогой захиргаанай толгойлогшо Батор Бадмажабэ гэгшэд уран дархан урашуулаараа омогорхон, сугларагшадые хани халуунаар амаршалаа. Г.Цыбиковэй нэрэмжэтэ үндэhэтэнэй музейн директор Рыгзын Цыдендоржиев буряад ёhо заншалаа, уран шадабарияа алдангүй, жэнхэни хубсаhаяа, урлал дархаяа абажа ябая, бэлигтэй залуушуулаа дэмжэжэ, Эрхүү хотодо ерэхэ жэл үнгэргэгдэхэ «Алтаргана» нааданда урагшатай хабаадая гэжэ уряалаа.

Зүдхэли нютагай Дарима Жалсановагай «Алтан дэлhэн» гэhэн буряад хубсаhанай суглуулбари, Дулдарга hууринай мүнгэшэ, алташа дархан Баир Ракшаевай эхэнэрэй зүүдхэлнүүд, Россиин Федерациин Правительствын «Душа России» гэhэн шанда хүртэhэн Дарима Дондоковагай түмэр, шүрэ хэрэглэжэ хэhэн зүйлнүүд, мэдээжэ уран зурааша Намжилма Эрдынеевагай «Элинсэгэйм ута зам» гэhэн гурбан зураг, Агын үхибүүдэй искусствын hургуулиин багша Дулма Балдановагай буряад хүүхэлдэйнүүд, уран зурааша, багша Дондок Мижитдоржиевай тоhон шэрээр зураhан «Морин эрдэни» зурагууд, РФ-гэй хүндэтэ архитектор, Агын Буряадай автономито тойрогой габьяата барилгашан Болот Дондоковой «Буддын шажан» гэhэн баримал бүтээл (модон, hиилэлгэ) гэхэ мэтэ хүнэй нюдэ шэмэглэнэ, hайхан мэдэрэл түрүүлнэ. Уран гартан Дулма Балданова, Болот Дондоков, Цэмэнжа Чимитцыренова, Вера Морхоева гэгшэд дүй дүршэлөө урашуулда дамжуулан, hуралсалай хэшээл үнгэргөө бшуу.

 

Дэлгэрэнгыгээр 9-дэхи дугаарта.

You have no rights to post comments