Сайдай тэмдэглэһээр, хизаар дотор ажаһуугшадай тоо үсөөн болоно. Забайкалкрайстадай баримтануудта үндэһэлхэдэ, 2021 оной январиин 1-эй байдалаар хизаар дотор 1054,1 мянган хүн ажаһууна (2020 оной январиин 1-дэ 1059,7 мянган хүн байгаа). Харин Агын Буряадай тойрогто 73984 хүн ажаһууна (2020 оной январиин 1-дэ 74038 хүн байгаа). Тиихэдэ Ага тосхондо, Дулдаргын ба Могойтын аймагуудта наһа барагшадай тооһоо нарайлалгын тоо үлүү байгаа, зүгөөр Агын аймагта 27 хүнөөр наһа барагшадай тоо үлүү гараһан байна. Нарайлалга тухай хэлэхэдэ, гурбадахи үхибүүгээ түрэхэ ушарнууд олошороо. Хоёрдохи үхибүүгээ түрэхэдэ, Алас Дурнын федеральна тойрогто 150 мянган түхэригэй дэмжэлтэ үзүүлэгдэнэ, гурбадахи үритэй болобол, 450 түхэригөөр, жэшээнь, ипотекын урьһаламжа хааха арга үгтэнэ бшуу.
"Социальный контракт" түлэблэл хэдэн шэглэлээр бэелүүлэгдэнэ.
2021 ондо «Социальный контракт» гэһэн ехэ хэмжээнэй түлэблэл бэелүүлэгдэжэ эхилээ гээд элидхэгшэ онсо тэмдэглээ. Энэ түлэблэл бүхы Россиин дэбисхэр дээрэ ябуулагдаха, зүгөөр нютаг орон бүхэн социальна дэмжэлтын өөр өөрын гурим батална.
Үбэр Байгалай хизаарта «Социальный контракт» түлэблэл дэлисэтэйгээр бэелүүлэгдэжэ эхилээ, тиигэжэ бага олзо оршотой гэр бүлэнүүдтэ болон ганса бэе зондо туһалха, тэдэнэй ажаһуудал хүнгэдхэхэ арга боломжо болохонь шуу.
Ажал бэдэрхэдэ, мэргэжэл шудалхада, олзын хэрэг эрхилхэдэ, үмсын хамһабариин ажахы байгуулхада г.м. хэдэн шэглэлээр туһаламжа үзүүлэгдэхэ байна. Тиихэдээ элдэб хэмжээнэй мүнгэн туһаламжа байха, жэшээнь, олзын хэрэг эрхилхэеэ хүсэһэн зондо, хилээмэ барихаяа шиидэбэ гү, али багахан наймаа нээбэ гү - 250 мянган түхэриг һомо-логдохо. Ажал бэдэрэгшэд ажаһуугшадые ажалаар хангалгын түбтэ түлбэригүй һуралсал гаража, шэнэ мэргэжэлтэй болохо аргатай, үшөө һуража байха саг соонь стипенди түлэгдэжэ байха бшуу.
Иигэжэ олондо бодото дээрээ дэмжэлтэ үзүүлхэ аргатай энэ түлэблэл 3-һаа 12 һара болотор саг соо бэелүүлэгдэхэ болзортой.
Удаань тойрогой дэбисхэр дээрэ 2020 ондо ямар гэмтэ ябадалнууд болооб, хуули бу-са ябадалнуудые һэргылхэ талаар 2021 ондо юун хэгдэнэб гэһэн асуудалаар элидхэл Россиин Дотоодын хэрэгүүдэй межмуниципальна «Агинский» таһагай дарга С.Н.Эрдынеев хээ, тойрогой дэбисхэр дээрэ тамир хангадаг һалбариин байдал болон олоной дунда тамирай янзануудые дэлгэрүүлхэ хараа замууд тухай тойрогой Захиргаанай тамир хүгжөөлгын таһагай дарга Булат Бальжинимаев хөөрөө, «Могойто» хото һууринай байдал болон хүгжэлтын замууд тухай мэрынь Чингис Дугаров элидхээ. Эдэ элидхэлнүүдэй баримтануудаар тобшо толилолгонуудые хожом гаргахабди.
Һүүлээрнь Түлөөлэгшэдэй суглаанай 2020 ондо ябуулһан ажалай дүнгүүд харагдаад, 2021 оной түрүүшын хахадта ябуулха ажалайнь түсэб тодорхойлогдоо.
Зүблөөнэй эсэстэ «Почётный житель Агинского Бурятского округа» гэһэн нэрэ зэргэ олгодог болохо тухай асуудал дээдын зургаануудта зууршалха ажал ябуулха бүлэг бүридхэгдэһэн байна.
Дарима БАЗАРОВА.
