Буряад Уласай шэнэ толгойлогшо А.С.Цыденовэй уялгаяа дүүргэжэ эхилһээрнь, хахад һараһаа үлүүхэн саг үнгэрбэ.
Бэелүүлэгдэжэ эхилһэн тодорхой үйлэ хэрэгүүдыень зарим журналистнууд тооложо захалаа. Алексей Цыденов түрүүшын ээлжээндэ түмэр харгыда хабаатай асуудалнуудта анхаржа, РЖД-гэй филиалай - Зүүн Сибириин түмэр замай дарга Василий Фроловтой уулзаһан байна. Улаан-Үдын түмэр замай вокзал шэнэдхэлгын проект гурбан жэл соо бүтээхэ гэжэ анханай хараалагдаһан байгаа юм. Гэбэшье хотын түбтэ удаанай барилга түбэгтэй байна, энээниие түргэдхэхэ арга бии гээшэ гү гэжэ А.Цыденов онсолһон байна. Харюудань В.Фролов: «ВСЖД бүхы аргыень бэдэржэ, хоёр жэл соо вокзал шэнэдхэлгын барилга дүүргэжэ үзэхэбди», - гэжэ найдуулба.
Улаан-Үдэ - Петровский Завод гэһэн замаар хото шадарай поезд табиха тухай асуудал анхарба. Мүнѳѳ РЖД-тэй энээн тухай хэлсээн тааруулагдажа байна, май һараһаа эхилэн, поезд ябадаг болохо гэжэ Василий Фролов мэдээсэбэ. Мүн Почтовый тосхондо (5652 км) түмэр зам дээгүүр гарадаг харгы үргэдхэхэ, тэрэниие аюулгүй болгохо, Улаан-Үдын тэгэн дунда 1905 оной Хубисхалай үйлсэдэ хүүргэ доогуур зам үргэдхэхэ асуудал хаража үзэхэ тухай хэлсэгдээ. Хойто аймагуудта ажаһуудаг зоной элүүр энхые хамгаалгада ехэ удха шанартай Северобайкальск хотын больницада томограф худалдан абаха хэрэгтэ туһалыт гэжэ Буряад Уласай толгойлогшын уялга дүүргэгшын хандахада, ВСЖД-гэй дарга «энэ жэлдэ шиидхэгдэхэ» гэжэ найдуулба. Таксимо тосхондо оршодог больница түмэр замһаа Буряад Уласай мэдэлдэ дамжуулгада республикын бюджедһээ мүнгэн зѳѳри һомолхо тухай хэлсэгдэбэ.
Дэлгэрэнгыгээр 10-дахи дугаарта.
