Бүгэдэ буряадай «Толон» һониной редакциин Буряад хэлэнэй һарын хэмжээндэ соносхоһон шог зугаатай үгүүлэлнүүдэй «Нютагай ябаган шог» конкурс түгэсэжэ, дүнгүүдынь элирбэ.
Бодото байдалда болоһон энеэдэтэй ушарнууд алил бүхы нютагта болодог, зоной дунда үргэнѳѳр тараһан байдаг. Хүнэй ухаан бодолдо муу юумэнэй мартагдажа, һайн юумэнэй үлэдэг һэн тула шог зугаатай үгүүлэлнүүд соогоо конкурсдо хабаадагшад хүнэй ухаамгай һүбэлгэниие гү, ямар нэгэн ондоохон аяг аашатайе, хүхюун зангыень, ямарханшье байдалда арга боломжо оложо шададагыень тэмдэглээ. Тиимэһээ уншагшаднай «Нютагай ябаган шог» гаршагтай толилолгонуудые нилээд анхаран уншаа ёһотой.
Энээнһээ урагша жэлһээ жэлдэ хабаададаг үсѳѳхэн зон конкурсын материалнуудые эльгээдэг һаа, мүнѳѳ жэл 18 хүн (элдэб нютагуудһаа: Ага, Догой, Зүдхэли, Согто-Хангил , Тугшан, Хойто-Ага, Зугаалай, Амидхааша) хабаадаһан байна. Зариманиинь нэгэ-нэгэ, бэшэниинь хоёргурбан шог хѳѳрѳѳнүүдые конкурсдо табиба. Һайшаалтайнь гэхэдэ, томошуулһаа гадна һургуулиин наһанай хүүгэдшье һонирхожо, үнэн болоһон ушарнуудые баян буряад хэлээр бэшэжэ, хэлэлгэеэ улам хүгжѳѳнэ. Жэшээнь, Агын тойрогой гимназиин 9 һурагшад конкурсдо хабаадаа. Хүн бүхэнэй шог хѳѳрѳѳнүүд һонирхолтой, газетэдэ удхын талаар нэмэри «шэмэглэл» боложо үгѳѳ. Конкурсдо ороһон 30-аад ажалһаа түрүүшын һуурида «Хэлэеэ дутуу мэдэхэдэ иимэ» (авторынь – лэглүүд хүбдүүд омогой Цырегма Дондокова, Согто-Хангил) гэһэн шог үгүүлэл хүртэбэ. Хоёрдохи һуури «Түрүүшын радио» (абхан харгана омогой Гэрэлма Цэдашиева, Агын гимнази) толилолго эзэлээ. Гурбадахи һуурида «Маанадые наадална гүт?» (баряахай харгана омогой Гомбодугар Болотов, Зугаалай) шог хѳѳрѳѳн гараа. Мүн «Мэдэхэгүй байхадаа, яахаб? » (сагаангууд омогой Цыбегмит Цыденова, Ага) ба «Улаан сэсэгүүдтэй кастрюли» (хуасай омогой Тимур Сиезбаев, Агын гимнази) гэһэн ажалнууд урмашуулгын шанда хүртэбэ.
Дэлгэрэнгыгээр 12-дохи дугаарта.
