Сагай уларилай ехээр хубилhан ушараар Байгал шадархи ой модод ехэ хохидолдо ороhон. Эрдэмтэдэй онсо тэмдэглэhээр, эндэ урдань үзэгдөөгүй ургамалай хорото үбшэнүүд дэлгэрнэ, шэнэ янзын хорхой шумуулнууд бии болоно. Тэдэнэр Алас Дурнаhаа болон Россиин баруун булангуудhаа асарагдаа гэжэ хэлэгдэнэ.
Ойн түймэрнүүдэй, ехээр модо отололгын хажуугаар Байгалые хүреэлhэн Хамар Дабаанай шэлэнүүдээр «бактериальная водянка» гэhэн үбшэн түрүүшынхеэ 2013 ондо олдоhон ушартай. Мүнөө тэрэ үбшэн бүхы ойнуудаар таража, хуша мододые хорлоно. Арбан жэлэй саада тээ Байгал дээрэ «уссурийский полиграф» гэжэ аймшагтай халдабарита үбшэн бии болоод, мүнөө бүхы Хамар Дабаанаар таранхай. Тэрээнhээ хуша модод олоороо хосорно, удангүй эдэ модод hалажа магад гэжэ эрдэмтэд hэргылнэ.
Байгал шадархи газарнуудай гүрэнэй тусхай аршалалта доро байдаг тула тэндэ санитарна сэбэрлэлгэнүүд хорюултай. Жэл бүхэндэ волонтёрнууд ой ошожо, хорото шумуулнуудые суглуулдаг. Теэд, жэшээнь, нэгэ модондо 60 мянга хүрэтэр хорхойнуудай суглардаг ушараар тиимэ хэмжээн ехэ аша туhагүй.
Баярма БАТОРОВА.
