Мэдээжэ дуушан Намгар Лхасаранова 1912 ондо бэшэгдэhэн буряад арадай дуунда шэнэ ами оруулба.
Буряад арадай дуунуудта эстрадын маяг оруулан гүйсэдхэдэг «Намгар» бүлэг шэнэ «Наян Наваа» гэһэн альбомдонь ороһон хэдэн дуу «Амар сайн» театрай тайзан дээрэһээ үнгэрэгшэ бимбын үдэр дурадхаа. Энэ альбомынь июнь hарын эсэстэ нара хараад, нэгэ hарын туршада бүхы дэлхэйн хугжэмэй чартнуудта табигдажа эхилһэн, заримдань түрүү һууринуудыешье эзэлһэн байна.
Намгар Лхасаранова наhанайнгаа нүхэр, хүгжэмшэн Евгений Золотарёвтой 2019 онһоо Санкт Петербургын Пушкинай гэрэй фонограммархив соо болон Москва, Улаан-Үдэ хотонуудай архивууд соо хүдэлжэ, арадай дуунуудые суглуулаа бшуу.
- «Наян Наваа» дуунай гурбан янзын аялгатай фонограммануудые олообди, тэдээн соо тон һонирхолтойнь буряад-монгол арадай дуушан – Боро аха гэгшын 1912 ондо дуулаһан дуун байгаа. Абяаниинь сэбэрээр бэшээтэй, саанань хөөрэлдэжэ байхань зандаханаа дуулдана, - гээд Намгар Аюшиевна энэ дуу гүйсэдхэхынгөө урда тээ тайлбарилба.
Тиин тодо сэбэрээр түүхэтэ энэ дуу гүйсэдхэһэнэйнгөө удаа Боро ахын дуунай фонограмма табижа, харагшадай сэдьхэл нилээд уяруулаа, арадай дуунай жэнхэни аялга ямар һайхан бэ даа гэжэ харуулаа.
Альбом соонь буряад арадай 11 дуун оронхой, зариманиинь архивай аудио-бэшэлгэнуудые hэргээhэн дуунууд, бэшэниинь Намгар Лхасарановагай тоглолтонуудтаа дууладаг аад, нэгэшье альбомдонь ороогүй дуунууд. Эдэ дуунууд соонь онсо һуури дуушанай абатаяа дууладаг «Захяа дуун» эзэлнэ. Мүнөө Аюша Лхасаранов абань 83 наһатай, Улаан-Үдэдэ басаганайнгаа тоглолтодо хабаадалсажа, залууһаа дууладаг дуугаа дуулалсаха юм.
Агада болоһон концертдэнь «Амар сайн» театрай захирал Оюна Дарижапова, дуушан Баир Тумуров болон буряад арадай хүгжэмтэ зэмсэгүүдэй оркестр хабаадалсаһан байна.
Дарима БАЗАРОВА.
