Россиин Дотоодын хэрэгүүдэй яаманай «Агинский» аймагууд хоорондын таһагай сагдаанар банковска картаһаа мүнгэеэ хулуулгаха ушарнууд олошороо гэжэ тэмдэглээд, банковска картын код, СМС болон ондоо мэдээнүүдые хэндэшье дуулгахагүй гэжэ тойрогой ажаһуугшадые һэргылнэ. Тойрогой дэбисхэр дээрэ 76 гэмтэ ябадал ушараа, тэдэнэй 35-иинь элирүүлэгдээ.
Мүнөө жэлэй сентябриин 14-дэ Ага тосхоной Д. гэжэ ажаһуугшада танигдаагүй хүн Центральна банкын ба Россиин Федерациин мүрдэлгын хорооной хүдэлмэрилэгшэ гээшэб гэжэ хонходожо, хүн нэрээртнай урьһаламжа хэхэ гэжэ туршаа, картын счёдһоотнай мүнгэ абажа болохо гэжэ дуулгаа. Тиигээд тэрэ хүнэй мэхэдэ орожо, Д. эрхэтэн +79777609154, +79777597972 номернуудта 51500 түхэриг оруулһан байна.
Март һарада Агын тойрогой ажаһуугшада 880010031-... гэһэн номероор хонходожо, банковска картаһаатнай мүнгэ хулууха гэжэ һэдэлгэ хэнэ, хулгай усадхахын тула түргөөр картынгаа номер хэлэхыень гуйба. Сошоһондоо тэрэ һамган бүхы мэдээнүүдые, СМС-мэдүүлгын код хэлэжэ үгөө. Тиигээд мэхэшэд 1 минутын туршада ПАО Сбербанкын картаһаань 7 мянган түхэригыень хулуужа абаа. Иимэл аргаар 1982 оной эрхэтэн 30 мянган түхэригөө хулуулгаа. Нүгөө ушарта 1958 оной эрхэтэндэ 849579843-... номероор хонходожо, картынтнай счёдһоо хэн нэгэн наймаа абахые оролдожо байна гээд, хулгай усадхахын тула банковска картынгаа тоо баримта ба СМС-мэдүүлгын код эльгээхэ тухай мэдүүлээ. Тиихэдэнь мэхэшэндэ бүхы мэдээнүүдые хэлэжэ, ПАО «Открытие» банкын картаһаа 20 гара мянган түхэригөө алдаа.
Энэл һарада 1981 оной эрхэтэн 650 мянган түхэригөөр мэхэлүүлээ, 1975 оной эрхэтэн – 7 мянгаар, 1976 оной эрхэтэн – 90 мянгаар. Мүн 1959 оной эрхэтэндэ 849503262-... номероор хонходожо: «17 мянган түхэриг эльгээхэ тухай мэдүүлгэ банкда оруулаа гүт?» гэжэ һонирхоо. Тиихэдэнь эрхэтэн ямаршье операци хээгүй тухайгаа мэдүүлбэ. Мэхэшэн ондоо мэргэжэлтэнэй хонходохо тухай хэлээд, трубкаяа табяа. Энэл номероорнь эхэнэр хонходожо, банкын картаһаатнай ондоо тээшэнь мүнгэ эльгээхэ мэдүүлгэ ороо, карточкаа үгы болгоогүй гүт гэжэ һонирхоходонь, эрхэтэн буруушааба. Тиихэдэнь картынгаа бүхы тоонуудые ба телефондонь ерэһэн СМС хэлэхэ хэрэгтэй гэхэдэнь, хэлэһэн соонь дабтажа үгөөд, 19 мянган түхэригөө үрибэ.
Агын тойрогой нэгэ ажаһуугша сайтаар нэгэ бүһэтэй хүнтэй танилсаа. Тэрэнь бэлэг мүнгэ эльгээхэб гэжэ үгэеэ үгэжэ, банковска картынь бүхы тоонуудые гуйжа абаа. Тиигэжэ тэрэ эхэнэр 30 мянга гаран түхэригөө хулуулгаа бшуу.
Гэмтэ хэрэг үйлэдэгшэ тойрогой нэгэ эхэнэртэ хонходожо, томо бизнес-компаниин түлөөлэгшэб гэжэ талмай дээрэнь хүдэлхые уряа. Ажал хэхын тула «Team Viewer» приложени табюулха тухай дурадхаа. Тиигээд тэрэ эхэнэр ноутбугтаа приложени табюулаа. Һүүлээрнь «Сбербанк-онлайнтай» ноутбугтаа орохо бүхы мэдээнүүдые хэлэжэ үгөөд, 300 гара мянган түхэригөө «бэлэглэһэн» байна.
Гэмтэ хэрэг үйлэдэгшэд элдэб мэхэ гохо һанахадаа бэрхэ болонги гэжэ дээрэ тоолоһон ушарнуудһаа ойлгохоор. Тэдэнэй мэхэдэ орожо, мүнгэеэ алдахагүйн тула банкын, али ондоо эмхинүүдэй (номерынь адлишуу, үгы һаа адлиш байгаа һаань) хүдэлмэрилэгшэб гээд, банковска картада хабаатай асуудалнуудые һуража эхилээ һаань, тэрэ дары хөөрэлдэхэеэ болигты. Һүүлээрнь банковска карта дээрэ байһан номероор хонходожо, дүүрэн мэдээсэл абаха аргатайт. Интернедтэ эд худалдажа абахадаа, сайт дээрэ бэшэгдэһэн бэеэ аршалха дүримүүдтэй танилсагты. Хэрбэеэ урид мүнгэеэ түлэхэ эрилтэтэй байгаа һаань, танигдаагүй хүндэ найдаха аргатай гүб гэжэ бодожо үзэгты. Интернет-магазинууд мобильна телефоной счёдто гү, али виртуальна кошелёгто мүнгэ оруулагты гэжэ дурадхажа байхагүй.
Хадуужа абагты: танигдаагүй зондо түлбэриин нэрэгүй системээр мүнгэ оруулжа, хэрэгэй бүтээгүй һаа, мүнгэеэ бусааха найдалгүй (гарантия) үлэхэт.
Хүндэтэ эрхэтэд, анхаралтай ба һэргэг байгты!
Нордоп БАБУЕВА.
Комментарии
Продвижение в топ
RSS лента комментариев этой записи