Агын Буряадай тойрогой Түлѳѳлэгшэдэй суглаанай ээлжээтэ зүблѳѳн апрелиин 26-да үнгэрѳѳ. Үдэрэй гаршагта дүрбэн асуудал харагдаһан байна.

 

Тэрэ тоодо агнуури болон “Алхана” үндэһэн паркын ажаябуулга тухай - Экологиин жэлдэ хамаатай хоёр ехэ асуудал харагдаа. Энээн тухай дэлгэрэнгыгээр удаадахи дугаартаа бэшэхэбди.

Агын тойрогой дэбисхэр дээрэ хүн зоной ажалай эрхэ хамгаалха талаар ямар ажал ябуулагданаб гэжэ ажал хинан хараха хизаарай гүрэнэй зургаанай Агын таһагай дарга Оюуна Дашиева мэдээсэбэ. Энэ таһагай 3 хинан харагшад Агын тойрогой болон Акшаагай, Оловяннын, Ононой, Бооржын, Шиилхын, Нэршүүгэй, Могочын, Тунгокоченой ба Петровск-Забайкальскын аймагуудай - хизаарай 40 хуби дэбисхэртэ ажал тухай хуули хэр бэелүүлэгдэнэб гэжэ хинадаг байна. Таһагай мэргэжэлтэд “эрхим хинан харагшад” гэһэн нэрэ зэргэдэ, Хүндэлэлэй грамотануудта барандаа хүртэһэн габьяатай. Элидхэгшын тэмдэглэһээр, тэдэнэр 2016 оной туршада ажал тухай хуули хэр сахигданаб гэжэ 677 шалгалта хээд, оройдоол 66 ушартань хуули эбдэгдээгүй гэжэ элирүүлээ. Харин 611 шалгалтын дүнгѳѳр хуули эбдэһэн 1904 ушар бүридхэгдѳѳ. Тиигэжэ 910 ажал үгэгшэдтэ бүхыдѳѳ 16100 мянган түхэригэй яла ашагдаһан байна. Үнгэрэгшэ жэлэй туршада ажалай эрхынгээ хаһагдаһан тухай 800 мэдүүлгэ ажалтад баряа. Эдэ мэдүүлгэнүүдээр хэмжээнүүд саг соогоо абтаа һэн гээд хэлэгдэбэ. Хүн ажалдаа байгаад гэмтээ гү гэжэ 15 ушар хинан харагшад мүрдэһэн байна. Тиин 5 үхэл, 5 гэмтэлгэ ажалтайнь холбоотой, 4 үхэл, 1 гэмтэлгэ ажалдань хабаагүй байба гэжэ элирүүлээ.

 

Дэлгэрэнгыгээр 18-дахи дугаарта.

You have no rights to post comments