Тойрогой 80 жэлэй ойдо зорюулагдаһан «Агын Буряадай тойрогой Захиргаанай кубок» гэһэн волейболоор хизаарай 16-дахи мүрысѳѳн октябриин 27-29-дэ үнгэргэгдэхэнь.
Энэ мүрысѳѳн урдын ехэ түүхэтэй. Анха түрүүн зүблэлтэ засагай үедэ «Ленинэй комсомолой кубок» гээд эмхидхэгдэдэг байһан. 2001 ондо тойрогой Захиргаанай толгойлогшо Баир Жамсуевай эдэбхи үүсхэлээр дахяад һэргээгдэһэн байна. Һүүлэй жэлнүүдтэ тус мүрысѳѳн хизаарай тамирай литэдэ оруулагдажа, Үбэр Байгалай эгээл эрхим волейбол наададаг бүһэтэйшүүлэй болон эхэнэрнүүдэй можонууд хаба шадалаа туршадаг болоһон юм.
Мүнѳѳ жэл можо бүхэн заабол ѳѳрын нэгэ адли, дугаарнуудтай хубсаһатай байха ёһотой гэһэн шанга эрилтэ табигдаха гээд эмхидхэлэй хорооной зүблѳѳн дээрэ хэлэгдэбэ.
Октябриин 28-да 11 сагта мүрысѳѳ нээлгын баяр ёһолол болохо. Мүрысѳѳнүүд хоёр талмайда: ЦСП-дэ болон «Тамир» байшан соо эмхидхэгдэхэ юм.
