Агын хүүгэдэй уран урлалай байшан соо үндэһэн буряад хубсаһатай хүмүүжэмэлнүүд «Барбаадай» гэһэн уранаар шүлэг уншалгын мүрысөөндэ октябриин 17-до буужа ерэһэн байна.
Мүрысөөн гурбан шатаһаа бүридөө: нэн түрүүн, һуралсалай эмхинүүдэй дэргэдэ болоо, аймагай, мүнѳѳ хизаарай хэмжээндэ үнгэрөө бшуу.
Шүлэг гүйсэдхэхын хажуугаар үхибүүд өөр тухайгаа, гэр бүлэ, түрэһэн тоонто, омог тухайгаа хөөрэжэ үгэһэн байна. Дондок Улзытуевай, Цыдып Жамбаловай, Шуя-Ханда Базарсадаевагай, Гунга Чимитовэй г.м. шүлэгүүд дурадхагдаа юм. Хүүгэдые адаглахада, булта шангаар, уранаар уншахаяа оролдоо. Тиин бүлэг бүхэндэ эрхимээр шүлэг уншадаг үхибүүдэй нэрэнүүд элирһэн байна. Бага наһанай үхибүүдэй дунда нэгэдэхи һууринуудта Адиса Бабуева («Аленький цветочек», Ага) ба Айрана Дондокова («Улаалзай», Гүнэй) хүртөө. Дунда наһанай бүлэгэй Намгар Наранова («Солнышко», Согто-Хангил) Даяна Цыденова («Тополёк», Шулуутай) хоёр уранаар шүлэгүүдые уншажа, олониие баясуулба. Ахалагша ба һургуулида бэлэдхэлэй бүлэгүүдтэ Цыбжит Батомункуева («Туяа», Могойто) ба Асалхан Тумуров («Далай», Ага) хоёр түрүүшын һуури хубааба. Буряад хэлэеэ дэлгэрүүлхэ, үндэһэн уран зохёолдоо анхарал хандуулха, талаан бэлигтэй үхибүүдые шагнаха зорилготойгоор тус конкурс үнгэргэгдөө.
