Октябриин 16-да тойрогой аман зохёолой бүлгэмүүдэй заншалта «Талын дуун» гэһэн конкурс Ага тосхоной соёлой байшан соо үнгэрбэ.

Бүлгэмүүдэй гэшүүд тайзан дээрэ ганса гансаараа, олоороо гаража, арадай дуунуудые гүйсэдхэһэн байна. Соёлой байшанай газаа үндэһэн буряад хубсаһатай хабаадагшад ёохор хатараа юм. Һүүлээрнь соёлой байшан соо бүлгэм бүхэн өөһэд тухайгаа танилсуулгын видеоролигуудые, элдэб янзын конкурсдо хабаадаһан фото-зурагуудаа харуулһан байна.

Мүрысөөнэй дүнгүүдээр, Агын аймагай Шулуутай һууринай «Алтаргана», Һүдэнтын үндэһэн соёлой «Талын сууряан» бүлгэмүүдэй эдэбхитэйшүүл баярай бэшэгүүдээр шагнагдаа юм. Гүнэй нютагай «Алтан булаг» бүлгэм хоёрдохи шатын дипломдо, мүнгэн шанда хүртөө. Һүдэнтэ һууринай Цыпелма Цыренова гансаараа дуулалгын номинацида түрүү һуурида гараһан байна. Шулуутай нютагай «Алтаргана» бүлгэм ёохор хатараар нэгэдэхи һуури эзэлээ. Можонуудай мүрысөөндэ түрүү һуури Ага тосхоной «Түмэн жаргалан» ветерануудай бүлгэм гараһан байна.

Жюриин гэшүүд бүлгэмүүдтэ «Арадай ансамблиин нэрэдэ хүртэхын тула баримтата бэшэгүүдээ бэлдэгты. Холо ойгуур талаан бэлигээрээ суурхажа, булта ута наһатай, удаан жаргалтай ябыт даа» гэжэ үреэбэ.

 

 

You have no rights to post comments