Могойто тосхоной баруун зүгтэ оршодог хүүргэ ашаглалгада тушаагдаба.
Хүүргэ нээлгын үедэ.
Тэбхэр табан жэлэй туршада Могойтын гол дээгүүр гарадаг хүүргэ баригдажа ядаа, авто-унаанууд тойроод, сэхэ голоороо ябадаг байһан. Олон жэлдэ ашаглагдаһан модон хүүргэ муудажа, дээгүүрнь унаануудай ябахань аюултай болоһон байгаа. Бороотой жэлнүүдтэ үерлөө һаа, бүри аймшагтай болодог һэн гэжэ ажаһуугшад тэмдэглэнэ. Хүүргын барилгада гүрэнэй бюджедһээ 71 сая түхэриг һомологдожо, шэнэ хүүргэ модоор бариха тухай түһөө түсэб бэлдэгдэһэн байгаа бшуу. Модон хүүргэ удаан зогсохогүй, хэды жэл болоод дахяад муудаха. Энэ ушарта Могойтын аймагай захиргаанай засаг хүтэлбэрилэгшэд тойрогой захиргаанда, хизаарай территоринуудые хүгжөөлгын министерство руу гаража, модоор бэшэ, харин түмэрөөр бариха тухай мэдүүлгэ бариһан байха юм. Тэрэнь дэмжэгдэжэ, «Дормостпроект» эмхи шэнээр түһөө түсэб зохёожо, үнгэрэгшэ 2016 онһоо барилга һууриһаа хүдэлөө. Красноярск хотын «Мостремстрой» эмхи тус барилгын генеральна подрядчик боложо, богони болзор соо шанартайгаар барижа тушаагаа. Хүүргэ утаараа 65 метр, үргэнөөрөө 7 метр юм. Ба-яр ёһололой нээлгэдэ хизаарай, тойрогой, Могойтын аймагай, Могойто тосхоной засаг зургаануудай болон подрядна эмхиин түлөөлэгшэд хүндэлэн татаатай улаан лентэ хайшалба. Барилгада эрхим хабаадаһан зондо баярай бэшэгүүд, бэлэгүүд барюулагдаа.
