Агын тойрогой 80 жэлэй болон Ж.Б.Балданжабоной нэрэмжэтэ литературна хамтаралай байгуулагдаһаар 70 жэлэй ойнуудта зорюулагдаһан баяр ёһололто суглаан октябриин 20-до болобо.
Суглаан хоёр хубиһаа бүридѳѳ. Түрүүн тойрогой дэбисхэр дээрэ уран зохёол хүгжѳѳхэ хэрэгтэ хубитаяа оруулһан бүлэг поэдүүдые хүндэлэн ёһололго болоо, шагналнууд барюулагдаа. Удаань «Алтан үлгы Агамнай» гэһэн эхилжэ байһан поэдүүдэй шүлэгэй конкурсын дүнгүүд татагдаһан байна. Наһанай 3 хэмжүүрээр, буряад болон ород хэлэнүүд дээрэ бэшэгдэһэн шүлэгүүдые жюриин гэшүүд хоёр үдэрэй туршада сэгнэһэн байна. Энэ конкурсдо эльгээгдэһэн эрхим шүлэгүүдэй согсолбори хэблэгдэхэ гэжэ хэмжээ ябуулгын түгэсхэлдэ соносхогдоо. Буряадаар бэшэдэг поэдүүдэй дунда Сахюуртын 9-дэхи ангиин һурагша Инга Чимитова; Сагаан-Уулын хүбүүн, Шэтын түмэр харгын техникумэй оюутан Жаргал Удаев; Сахюуртын пенсионерка Цыренханда Цыбенова эрхим шүлэгүүдтэй байжа, гран-при шангуудта хүртѳѳ. Ород хэлэн дээрэ бэшэдэг уран шүлэгшэдэй дундаһаа Шэнэ Орловскын 6-дахи ангиин һурагша Виктор Троицкий, Ага тосхоной багша Алеся Скороход, Шэнэ Орловскын пенсионер Лев Мирзуитов гэгшэдэй шүлэгүүд шалгарба.
К.И.Базарсадаевай нэрэмжэтэ уран урлалай һургуулиин хүмүүжэмэлнүүд хүгжэм дуугаа, хатараа сугларагшадта бэлэглэжэ, баяр ёһололдо бүришье һүр жабхалан оруулһан байна.
Хэмжээ ябуулга тухай дэлгэрэнгыгээр «Улаалзай» гэһэн тусхай дугаартаа бэшэхэбди.
