Тойрогой дэбисхэр дээрэ һүүлэй жэлнүүдтэ столой теннис наададаг, тамирай энэ янзаар һонирходог зоной тоо улам олошорно, олон мүрысѳѳнүүд эмхидхэгдэнэ.
Ноябриин 11-дэ Арадай нэгэдэлгын үдэртэ зорюулагдаһан столой теннисээр Агын аймагай нээмэл мүрысѳѳн Баян-Булаг ба Һүдэнтэ нютагуудта эмхидхэгдэхэнь. Энэ мүрысѳѳ үнгэргэхэ эдэбхи үүсхэл Баян-Булагай “Онон” ТОС-ой гэшүүд гаргаһан байна. Мүрысѳѳн бүһэтэйшүүлэй дунда наһанай 4 бүлэгтэ: 40, 55, 65 наһа хүрэтэр ба 65-һаа дээшэ, мүн эхэнэрнүүдэй дунда 35, 55 наһа хүрэтэр ба 55-һаа дээшэ наһанай бүлэгүүдтэ үнгэргэгдэхэ юм. “Тиихэдээ залуушуул Һүдэнтэдэ, бэшэниинь Баян-Булагта наадаха, мүрысѳѳнэй абаргые элирүүлгын наадан Баян-Булагта үнгэргэгдэхэ. Иигэжэ ажаһуугшадаа тамирта дүршүүлхэ зорилго табинабди”, - гээд ТОС-ой түрүүлэгшэ Биликто Базаров мэдээсэбэ.
