Шэтэ хотодо ноябриин 1-4-дэ уран бэлигэй «Гуранёнок-2017» уласхоорондын фестиваль үнгэржэ, Ага нютагай эдиршүүл ехэ амжалта туйлаа юм.
Агын хүүгэдэй уран урлалай һургуулиин жэшээтэ «Баяр» хатарай ансамблиин ахалагша бүлэгэй 13-15 наһанай 30 үхибүүд (хүтэлбэрилэгшэнь - Дарима Аюшиева) «Баярай жороо», «Энхэрэл», «Тугас» хатарнуудые һайханаар харуулжа, лауреадай 1-дэхи шатын дипломоор шагнагдаа. Түрүүшынхеэ иимэ мүрысөөндэ хабаадаһан тус ансамблиин бага бүлэгэй хатарша хүбүүд, басагад (9-11 наһатай) «Булта сугтаа» гэһэн хатар ба буряад ёохор абьяастайгаар гүйсэдхэжэ, шангай 2-дохи, 3-дахи һууринуудые эзэлээ юм. Энэл ансамблиин гэшүүн, 13 наһатай Номин Батоева гансаараа «Уран гар» монгол хатар гүйсэдхэжэ, 2-дохи һуурида гараа. Тус ансамблиин ахалагша бүлэгэй үхибүүд «Абьяастай эдиршүүл» гэһэн зунай лагерьта амарха сертификадуудтай болоо.
Мүн Амидхаашын дунда һургуулиин «Улаалзай» ансамблиин 32 хатарша үхибүүд амжалта туйлажа, шангай 3-дахи һуури эзэлээ. Тэдэнэр нёдондо уласхоорондын энэ фестивалиин гран-при шан абажа, илагшад болоһон юм.
