Эндэ һая Россиин субъект бүхэндэ Арадай нэгэдэлэй һайндэртэ зорюулагдаһан «Международный Большой этнографический диктант» гэһэн акцида Агын тойрог оролсоо.
Диктант бэшэлгын үедэ.
Агын багшанарай колледж соо ноябриин 3-да үглөөнэй 9-һөө хүн зон сугларжа эхилээ. Һургуулиин үхибүүд, багшанар, оюутад, наһатайшуул, дунда наһанай зон (хамта 88 хүн) хоёр аудитори соо һуужа, 45 минутын туршада гушан асуудалтай тестдэ харюунуудые үгэһэн байна. Диктант бэшэһэн зоной дунда зэргын балл - 14,56-да хүрөө. Эмхидхэгшэд хүн бүхэндэнь хабаадагшын сертификат барюулаа бшуу.
Могойтын гурбадахи дунда һургуулиин һурагшад иигэжэ хэлэбэ: «Диктант бэшэхэдэмнай, хэшээлнүүдтээ үзэдэг сэдэбүүд ехэ туһалаа. Шажан ба хүнэй эрхэ тухай асуудалнууд эгээл бэлэн гэжэ һанагдаа, нүгөө жэл иимэ акцида заабол хабаадахабди». Хабаадагша Э.Соктоев Эсэгэ оронойнгоо түүхэ тухай асуудалнуудые тэмдэглээ: «Суг нэгэ гүрэндэ ажаһуудаг арадуудай ёһо заншал, гуримуудые мэдэхэ гээшэ ехэ. Иимэ хэмжээ ябуулга хэхэдэ, арадууд нэгэдэнэ, нүгөө жэл һайн дүнтэй бэшэхын тула мүнөөнһөө бэлдэжэ эхилхэ хэрэгтэй».
Энэ акци һанаһан зондо баярай үгэнүүд олоор хэлэгдээ. Олон хүн «Бессмертный полк» гэһэн акциин аша үрэтэйнь жэшээлһэн байна. Бүхы Росси соо бэшэгдэһэн диктантын дүнгүүдые декабриин 12-то www. miretno.ru сайт дээрэ харахада болохо.
