Ноябриин 11-дэ Арадай нэгэдэлэй үдэртэ зорюулагдаһан столой теннисээр Агын аймагай нээмэл мүрысѳѳн Баян-Булаг ба Һүдэнтэ нютагуудта эмхидхэгдээ.
Мүрысѳѳндэ бүхыдѳѳ 60-аад тамиршад хабаадаа.
Энэ мүрысѳѳ үнгэргэхэ эдэбхи үүсхэл Баян-Булагай ветерануудай зүблэлэй түрүүлэгшэ, теннисист Цыденеши Дамдинович Цынгуев гаргаһан байна. Үүсхэлыень нютагай «Онон» ТОС-ой (түрүүлэгшэнь – Билигто Дашинимаевич Базаров) гэшүүд, «Урда-Ага» хүдѳѳ һууринай захиргаан, «Урда-Ага» агрокооперативай хүтэлбэри болон Агын аймагай захиргаанай соёлой, тамирай хороон дэмжэһэн байна.
Тойрогой тамирай ветеран, турнир эмхидхэгшэдэй нэгэн Дашинима Цыденовэй тэмдэглэһээр, ажаһуугшадай тоогоор бодобол, Баян-Булагта эгээл олон хүн теннис наададаг байна, зариманиинь бүри 50, 55 наһа хүрѳѳд, гартаа ракеткэ абаһан намтартай.
Аймагай захиргаанай соёлой ба тамирай хорооной түрүүлэгшын орлогшо Жаргал Дондоков энэ турнир аймагай тамирай календарна түсэбтэ оруулха тухай дурадхаа, тиигэжэ тус мүрысѳѳ заншалта болгохоор хараалагдаба.
Халуун тулалдаануудай эсэстэ эдэ илагшад тодорбо: Цындыма Дугаржапова (Ага), Сайжен Юндунова, Ханда Дамбиева (Могойто), Баирма Дармаева (Амидхааша), Очир Цыгдаев (Баян-Булаг), Батор Дамдинов (Ага), Булат Аюров (Баян-Булаг), Баир Гомбоев (Ага), Цыден Бутитов (Ага-Хангил). Мүрысѳѳнэй абарга илагшад Сайжен Юндунова ба Батор Дамдинов болоо. Можын мүрысѳѳндэ дамжуулгын кубок Баян-Булагай можодо барюулагдаа.
