Тойрогой тосхонгуудые ба хүдөө нютагуудые ариг сэбэр болголгоор энэ жэлэй дүнгүүд татагдаа.
Тус конкурс тойрогто арба гаран жэлдэ эмхидхэгдэнэ. Байгша ондо Экологиин жэлдэ зорюулагдаа. Хабарай ба намарай сагуудта нютаг бүхэндэ санитарна сэбэрлэлгээр ехэ ажал ябуулагдаа. Үшөө конкурсын соносхогдоодүй байхада, олон нютагуудта эмхитэйгээр ажал хэгдэжэ эхилһэн байгаа. Гэхэтэй, сэбэрлэлгын ажалда анхарал хандуулаагүй, хүдэлмэри хээгүй нютагуудшье бии.
«Эгээл сэбэр аймагай түб» ба «эгээл сэбэр хүдөө һуурин» гэһэн хоёр янзада эрхимүүд элирээ. Аймагай түбүүдэй хоорондо түрүүшын һуури гаргагдаагүй, харин 2-дохидо - Дулдарга һуурин, 3-дахида Могойто тосхон гараһан байнад. Хүдөө һуурингуудай хоорондо эгээл олон балл Могойтын аймагай Урта нютаг абаа. Ариг сэбэрээрээ һүүлшын жэлнүүдтэ түрүү һуури эзэлдэг Агын аймагай Гүнэй нютагые уртынхид баллаараа хүсэһэн байна. Гүнэй нютаг Хойто-Агатай 2-дохи һуури хубааба. Удаадахи һуурида Дулдаргын аймагай Табтаанай, Зүдхэли, Могойтын аймагай Догой һуурингууд гараһан байна. Тиихэдэ Могойтын аймагай Сагаан-Уула һуурин, Агын аймагай Шэнэ Орловск тосхон 4-дэхи, 5-дахи һууринуудые эзэлээ.
------------------------------------------------------------------------------------------------------------------------------------------------------
Эрхим ТОС-уудые харалгаар дүнгүүд мүн лэ соносхогдоо.
Тус конкурс 2014 онһоо эмхидхэгдэнэ. Нютаг бүхэнэй ажаһуугшад өөһэдөө үүсхэл гаргажа, һууринаа өөдэнь татана. Түрүүшын жэлдэ 100 хүрэхэгүй ТОС байдаг һаа, мүнөө 140 ТОС бүридхэлдэ абтанхай. ТОС-ууд байгуулагдажа, мүнгэ татажа гү, али спонсорнуудые оложо, нютагтаа аша туһатай ажал ябуулна. Үнгэржэ байһан жэлдэ Дулдаргын сэлеэнэй 16-дахи квартал багашуулай наадаха талмай баряа, санитарна сэбэрлэлгэдэ хабаадалсаа. Могойтын аймагай Хила һууринай ажаһуугшад худаг заһабарилаа, мододые һуулгаа. Зугаалайн «Центральный» ТОС-ойхид стадионой ба Илалтын парк һэльбэн шэнэлээ. Агын аймагай Гүнэйн «Дүлэн» ТОС-ойхид түймэр сарадаг пост барилсажа, ниитын ажалда хам оролсоһон байна.
Дүнгүүдтэйнь танилсуулхада, Дулдаргын «16-дахи квартал», Шэнэ Орловскын «Солнышко», «Улыбка» ТОС-ууд шалгараа. Бага һуурингуудай хоорондо Хилын «Хүрэлжэ», Балжанын «Лотос», Догойн Харганаашын «Найдал», Урда-Агын Баян-Булагай «Онон», Ушарбайн Бурятская станциин «Бурятская» ТОС-ууд эрхимлээ. Эрхим социальна түһөө түсэб зохёоһон ТОС-уудай хоорондо Гүнэйн «Дүлэн», Зугаалайн «Центральный», Хойто-Агын «Наран», Алханын «Северный», Зүдхэлиин «Радуга», Ушарбайн «Бэлиг» түрүүшүүлэй тоодо ороһон байна.
