Ага тосхондо 17 наһа гүйсөөдүй эдир хүбүүдэй хоорондо дүрэ буляалдаата барилдаагаар Бүхэроссиин мүрысөөн үнгэргэгдөө.

 

Б.Сультимов (баруун гарһаа) илалта туйлаба.

 

Дүрэ буляалдаата барилдаагаар Россиин хэмжээнэй мүрысөөн Ага нютагтамнай 4-дэхеэ үндэр хэмжээндэ эмхидхэгдэбэ. Барилдаанай энэ һайндэр хизаарай дүрэ буляалдаата барилдаанай федерациин президент, сенатор Баир Жамсуевай үүсхэлээр үнгэргэгдэбэ. Аяар холын Севастополь хотын, Москвагай, Астраханиин, Калининградай, Эрхүүгэй, Кемеровын, Новосибирскын, Амарай, Еврейскэ автономно можонуудай, Буряад, Татар, Хакас, Саха-Яхад, Тыва, Коми, Чечен оронуудай, Ханты-Мансиин тойрогой, Ставрополиин, Красноярскын, Хабаровскын, Краснодарай, Примориин, Забайкалиин хизаарнуудай, тэрэ тоодо Агын тойрогой 220 тамиршад хабаадаа юм. Тэдээн соо 26 эдиршүүл тамирай мастерта кандидадууд байгаа. Эгээл олон 43 тамиршад Яхад оронһоо ерээ, Красноярскын хизаарые 29, Тыва орониие 20 тамиршад түлөөлөө. Хойто Кавказай - Дагестан, Осети-Алани, Ингушети оронуудһаа барилдаашад ерээгүй бшуу. Тэдэ нютагуудай барилдаашадай хабаадалга ямаршье мүрысөө шэмэглэдэг бэлэй. Тамирай нааданда холо ойроһоо буужа ерэһэн айлшадые мүрысөөнэй эмхидхэлэй хорооной гэшүүд халуунаар угтан абаа. Сүлөө сагай гарахада, кураторнууд айлшадта Ага тосхоной алдарта газарнуудые: музей, хүшөөнүүдые харуулан, экскурси хээ. Эгээл холын нютагуудһаа ерэһэн тамиршад һоригшодтоёо «Гоби» гэһэн хамтын буудалда тогтоһон байна. Агынхидай хүндэмүүшэ байһые онсо тэмдэглээ. Гансал хүйтэн уларилда тааража ядаа. Севастополиин можын һоригшо Юрий Гутников кроссовко гуталаар ерэһэндээ мэгдээд абаа. Хара далайн хажууда 18 градус дулаан, ноябрь соо уһанда орожо байдаг. Севастопольдо барилдаан һаял хүгжэлтэеэ абажа байна. Украинын бүридэлдэ байхадаа, барилдаагаар мүрысөөнүүдтэ мүртэй ябадаггүй байһан. Ставрополиин хизаарай ахалагша һоригшо Георгий Петров гурбан тамиршадые асарһан байна. Ага нютаг түрүүшынхеэ ерээ. Минеральные Воды – Москва – Шэтэ гээд самолёдоор 13 часай туршада ниидэжэ, холын зам гаталаа бшуу. Татарстанай Набережные Челны хотоһоо тамиршадые эхэнэр һоригшо ударидажа асарһан байна. Танилсаһамнай, барилдаагаар уласхоорондын классай тамирай мастер Лилия Фетхаловна Исламова байба. Залуудаа Европын, дэлхэйн хибэс дээрэ амжалтатай барилдажа ябаһан. Холын айлшад «Алтан Сэргэ» буудалда байрлаһан байна. Һоригшын хэлэһээр, Татарстанда футбол, хоккей нааданууд ехэ хүгжэнги. Барилдаан хойгууршаг һуурида ябадаг. Тиибэшье ороной Тамирай министерствын бюджедһээ барилдаанда мүнгэн һомологдодог болоһон.

 

Дэлгэрэнгыгээр 48-дахи дугаарта

You have no rights to post comments