Тамирай уласхоорондын классай мастер Сокто Намжиловай дурасхаалда зорюулагдажа, декабриин 2-то Ага тосхондо классическа шатараар нээмэл 5-дахи мүрысөөн эмхидхэгдээ. Энэ мүрысөөндэ элдэб орон нютагуудай шатаршад хабаададаг заншалтай.
Сокто Намжилов – Буряад ороной оло дахин абарга, Болгарида, Венгридэ, Чехословакида ба Узбекистанда үнгэргэгдэһэн уласхоорондын турнирнуудай илагша. Тэрэ Буряад ба Хальмаг оронуудта, Монголдо, Агын тойрогто һоригшоор хүдэлһэн. С.Намжилов эдиршүүлэй хоорондо дэлхэйн абарга С.Сюгировые ба басагадай дунда Европын абарга И.Ивахиновае хүмүүжүүлһэнсолотой. 1998 ондо Агын Буряадай автономито тойрогто шатар хүгжөөхэ зорилготойгоор ерэһэн, һоригшоор хүдэлхэ соогоо тамирай мастерта 6 кандидадуудые бэлдэһэн.
Һургуулиин хүүгэдэй хоорондо шатараар үнгэргэгдэһэн хизаарай мүрысөөнүүдтэ тойрогой можонуудтай ана-мана тэмсэхэ можонууд үгы. 2015 ондо Дулдаргын аймагай һурагшад шатараар Забайкалиин хизаарай түрүүшын олимпиада шүүгээ һэн. 2016 ондо Могойтын 2-дохи дунда һургуулиин можо шатараар «Белая ладья» бүхэроссиин мүрысөөнүүдэй хизаарай шатада илажа, орон нютагаа Сочидо түлөөлөө һэн. 2017 ондо Забайкалиин түүхэдэ түрүүшынхеэ басагадай хоорондо 11 наһа хүрэтэр бүлэгтэ Я.Жапова классическа шатараар Сибириин федеральна тойрогой абарга болоо, түргэн шатараар мүнгэн медальда хүртөө. Яна 2018 ондо Сочидо үнгэргэгдэхэ Россиин мүрысөөндэ Сибириин федеральна тойрог түлөөлхэ эрхэдэ хүртөө юм. Тиигэжэ С.Намжиловай шатарай тамирта үндэһэ табиһан заншал мүнөө болотор үргэлжэлһөөр.
Илагшад: «А» турнирта – О.Бадмацыренов (Улаан-Үдэ), «Б» турнирта – А.Садыков (Улаан Үдэ), Т.Захарова (Шэтэ). Ветерануудай хоорондо: Б.Норжилов (Могойто), Ц.Дагбаева (Ага), Б.Гомбоев (Могойто). Эдиршүүлэй хоорондо: А.Цыбенов (Улаан-Үдэ), А.Очирова (Могойто). 2004-2007 онуудай хүүгэдэй хоорондо: В.Сундуев (Шэтэ), Д.Шомоева (Улаан-Үдэ); 2008-2009 онуудай үхибүүдэй дунда: Н.Лыгдыпов (Ага), В.Санданова (Могойто), 2010 онойхидой хоорондо Э.Батожаргалов (Ага), Б.Бальжинимаева (Могойто).
