Буряадай арадай артистка, Буряад Республикын соёлой габьяата хүдэлмэрилэгшэ, Улаан Баатар хотодо үнгэргэгдэһэн уласхоорондын арадай уртын дуунай конкурсын лауреат, багша Ешин-Хорло Гомбоин декабриин 4-дэ түрэл Ага-Хангил нютагайхидтаа «Арадайм дуунай дээжэһээ» гэһэн концерт-наада бэлэглэжэ, арадай дуунай һайндэр нэрьеэ һэн.
Е-Х.Гомбоин.
Энэ концерт-нааданай баяр ёһололдо Могойтын аймагай захиргаанай толгойлогшо Булат Нимбуев түрүүтэй засаг зургаанай түлөөлэгшэд, түрэл гаралынь, үетэн нүхэдынь, нютаг зон олоороо сугларжа, алдарта дуушанда, концерт-нааданда хабаадаһан абьяастанда халуун баяр хүргөө, бэлэгүүдые баряа бшуу. Буряад арадай артист, Монголой габьяата артист, хүгжэмшэн Балданцыренэй Баттувшин, арадай дуушан Баярма Дамдинова, нютагай ирагуу дуушад Доржи Бадянов, Долгор Болодонова, Бутид Балдоржиева, Ирина Жигжитова, Рыгжидма Дамдинова, Маргарита Жапова, Энхэма Жигмитова ба бэшэн аялга дуугаа зэдэлүүлжэ, олоной одо заяа бадаруулаа. «Победа» колхозой (түрүүлэгшэнь – В.Дамбиев), Ага-Хангилай дунда һургуулиин (директорынь – Ц.Шойропова), соёлой байшанай (директорынь - Х.Чимитова) ажалтад мартагдашагүй уулзалга эмхидхэжэ, нютаг зон арадай дуунуудые бахархан шагнажа, аргагүй ехээр баясаһан байна.
